ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
នាយករដ្ឋមន្ត្រីថៃ លោកប្រាយុទ្ធចាន់អូចា មិនបដិសេធទេ នូវលទ្ធភាពនៃការរុះរើគណៈរដ្ឋមន្ត្រីនៅក្នុងជួររដ្ឋាភិបាលរបស់លោកដែលកំពុងរងការរង្គោះរង្គើជាបណ្ដើរៗ។ កាលពីពេលថ្មីៗនេះ រដ្ឋមន្ត្រីចំនួនបីនាក់បានបាត់បង់តំណែង និងត្រូវចាប់បញ្ជូនទៅឃុំឃាំងនៅក្នុងពន្ធនាគារ ពាក់ព័ន្ធនឹងការចោទប្រកាន់ថាពួកគេជាប់ពាក់ព័ន្ធនឹងការប្រើប្រាស់អំពើហិង្សានៅក្នុងពេលហែបាតុកម្មកាលពីអំឡុងឆ្នាំ២០១៣-២០១៤ ប្រឆាំងនឹងរដ្ឋាភិបាលរបស់លោកស្រីយីងឡាក់។
ពាក់ព័ន្ធនឹងសំណួរថា «តើលោកនឹងរកមនុស្សមកជំនួសតំណែងដែលនៅទំនេរទាំងបីនោះដែរឬទេ?» លោកប្រាយុទ្ធចាន់អូចាថ្លែងថាលោកកំពុងតែពិចារណាពីរឿងនេះ។ លោកថារដ្ឋាភិបាលកំពុងផ្ដោតសំខាន់លើតំណែងទាំងបីនេះសិន។ ប៉ុន្តែបើមានការស្នើសុំរុះរើតំណែងដទៃទៀត លោកនឹងពិនិត្យមើល តើវាជារឿងសមហេតុផលដែរឬទេ។ តំណែងទាំង៣នោះមានរដ្ឋមន្ត្រីក្រសួងសេដ្ឋកិច្ច, រដ្ឋមន្ត្រីក្រសួងអប់រំ និងអនុរដ្ឋមន្ត្រីក្រសួងដឹកជញ្ជូន។
តុលាការរកឃើញថាពួកគេមានទោសពីបទប្រើប្រាស់អំពើហិង្សានៅពេលហែបាតុកម្មប្រឆាំងនឹងរដ្ឋាភិបាលរបស់លោកស្រីយីងឡាក់។ តាមផ្លូវច្បាប់ ពួកគេអាចប្ដឹងទាស់ទៅឧទ្ធរណ៍ជាបន្តទៀត ប៉ុន្តែតាមផ្លូវច្បាប់ដដែល ពួកគេត្រូវបាត់បង់មុខតំណែងដោយស្វ័យប្រវត្តិ។
លោកប្រាយុទ្ធចាន់អូចាថ្លែងថានៅសប្ដាហ៍ក្រោយ, រដ្ឋាភិបាលនឹងប្រកាសតែងតាំងបេក្ខជនដែលត្រូវមកកាន់តំណែងទាំងនេះជាបណ្ដោះអាសន្ន។ ចំណែកការរកមនុស្សមកកាន់តំណែងទាំងនោះពេញសិទ្ធិអាចនឹងធ្វើឡើងនៅក្នុងពេលឆាប់ៗនេះ ប៉ុន្តែលោកយល់ថារឿងនេះមិនប្រញាប់ប្រញាល់ពេកទេ។
តើលោកប្រាយុទ្ធចាន់អូចាបារម្ភទេថាបក្សដទៃទៀតនៅក្នុងជួររដ្ឋាភិបាលចម្រុះអាចនឹងឆ្លៀតនៅក្នុងស្ថានការណ៍លំបាកនេះ ដើម្បីទាមទារមុខតំណែងរដ្ឋមន្ត្រីខ្លះដែរឬទេ? លោកប្រាយុទ្ធចាន់អូចាប្រមើលឃើញថារឿងនេះប្រហែលជាមិនទាន់កើតឡើងទេ។ ទោះជាយ៉ាងណាក្ដី, បើយោងតាមប្រភពពីគណបក្សផាឡាំងប្រឆាឆាតរបស់លោកប្រាយុទ្ធអូចា, គណបក្សដៃគូខ្លះកំពុងតែកិចកុកចង់បែងចែកតំណែងនៅក្នុងគណៈរដ្ឋមន្ត្រីសាជាថ្មី៕
ប្រែសម្រួល៖អនសំអាង