ថ្ងៃពុធ ទី២៤ ខែមេសា ឆ្នាំ២០២៤
ថ្ងៃពុធ ទី២៤ ខែមេសា ឆ្នាំ២០២៤
តារាចម្រៀង ង៉ែត លីតា សម្រេចចិត្តបោះបង់អាជីពចម្រៀងចោល បន្ទាប់ពីរៀបការមានស្វាមី ដើម្បីត្រៀមខ្លួនយកកូន និងមើលអាជីវកម្មផ្ទាល់ខ្លួននៅខេត្ត ព្រះសីហនុ ។
រៀបការបានជិតមួយខែ តារាចម្រៀង ង៉ែត លីតា បានដឹកដៃស្វាមីខ្លួនមករៀបចំពិធីកាត់ចំណងដៃនៅទីក្រុង ភ្នំពេញ ដើម្បីជួបជុំញាតិមិត្តដែលខកខានមិនបានចូលរួមពិធីមង្គលការខ្លួននៅខេត្ត ព្រះសីហនុ កាលពីពេលកន្លងមកនេះ ។ អ្វីដែលគួរឱ្យចាប់អារម្មណ៍នោះគឺតារាស្រីរូបនេះនឹងបញ្ចប់អាជីព ចម្រៀងចាប់ពីពេលនេះតទៅ ។
ង៉ែត លីតា បានរៀបចំពិធីមង្គលការខ្លួនយ៉ាងធំដំកាលពីថ្ងៃទី ២២ ខែ មករា កន្លងទៅនៅខេត្ត ព្រះសីហនុ ដោយពុំមានវត្តមានសិល្បករចូលរួមឡើយ ដោយឡែកកាលពីពេលថ្មីៗ នាងបានដឹកដៃស្វាមីរបស់ខ្លួនមករៀបចំពិធីកាត់ចំណងដៃ នៅទីក្រុង ភ្នំពេញ និងបានអញ្ជើញមិត្តភក្តិសិល្បៈជា ច្រើនចូលរួមអបអរសាទរ នាថ្ងៃនោះ ង៉ែត លីតា ញញឹមបិទមាត់មិនជិតឡើយ ។
ង៉ែត លីតា បានឱ្យដឹងក្នុងថ្ងៃពិសេសរបស់ខ្លួនថា ក្រោយពេលរៀបការរួច នាងសម្រេចចិត្តបញ្ចប់ជីវិត សិល្បៈរបស់ខ្លួនទាំងស្រុង ដើម្បីមានពេលវេលាមើលការងាររកស៊ីនៅខេត្ត ព្រះសីហនុ រួមជាមួយ ស្វាមី ។
បន្ទាប់ពីរៀបការរួច ង៉ែត លីតា មានគម្រោងនឹងយកកូនភ្លាមៗ ពីព្រោះពេលនេះនាងមានវ័យ ៣១ ឆ្នាំហើយ មិនអាចបណ្តែតបណ្តោយឱ្យតទៅមុខទៀតបានឡើយ ណាមួយស្វាមីនាងក៏ចង់បានកូនភ្លាមៗជាបន្តបន្ទាប់ផងដែរ ។
គួរបញ្ជាក់ផងដែរថា ង៉ែត លីតា បានប្រលូកក្នុងសិល្បៈជាង ១០ មកហើយ នាងធ្លាប់ជាតារាចម្រៀងលេចធ្លោម្នាក់ធ្លាប់នៅក្នុងក្រុមចម្រៀង Girl Band ក្រោយមកនាងបានចូលច្រៀងក្នុងផលិតកម្ម M និងមានក្រុមរាំផ្ទាល់ខ្លួនផងដែរ ហើយបទចម្រៀងចុងក្រោយដែលធ្វើឱ្យទស្សនិកជនចាប់អារម្មណ៍នាង ខ្លាំងបំផុតមានចំណងជើងថា « កាន់តែយំកាន់តែនឹកបង » ៕
អត្ថបទ ៖ ម៉ា រីសា រូបភាព ៖ ហ៊ុន សុជាតា