ភាពយន្ត “Tom និង Jerry” ឆ្នាំ២០២១ នឹងចាប់ផ្ដើមបញ្ចាំងនៅចុងសប្ដាហ៍នេះហើយ ដោយភាពយន្តថ្មីនេះនឹងប្លែកពី Tom & Jerry ស៊េរីផ្សេងៗកន្លងមកដោយសារមានសម្ដែងជាមួយមនុស្សពិត

តួអង្គគំនូរជីវចលដ៏ល្បីល្បាញគឺ Tom និង Jerry បានវិលត្រឡប់មកបន្តសង្គ្រាមតស៊ូពោរពេញដោយភាពកំប្លុកកំប្លែងសាជាថ្មី ប៉ុន្តែលើកនេះពួកគេនឹងជួបគ្នាក្នុងពិភពមនុស្សពិតវិញម្ដង។

ក្នុងភាពយន្តថ្មីមានចំណងជើងថា “Tom and Jerry” តួអង្គទាំងពីរនឹងត្រូវជួបគ្នាដោយចៃដន្យនៅក្នុងសណ្ឋាគារដ៏ល្បីមួយនៅទីក្រុងញូវយ៉ក ដែលកំពុងត្រៀមរៀបចំពិធីមង្គលការដ៏ធំប្រចាំទសវត្សរ៍។ តារាសម្ដែងស្រី Chloe Grace Moretz (ខ្លូអ៊ី ហ្គ្រេស ម៉ូរេតស៍) ដែលដើរតួជាបុគ្គលិកថ្មីរបស់សណ្ឋាគារ នឹងជាតួអង្គសំខាន់ដែលត្រូវទប់ស្កាត់បញ្ហាបង្កដោយតួអង្គកំពូលកូរទាំងពីរ។

គួររំឭកថា តួអង្គ Tom និង Jerry ត្រូវបានបង្កើតឡើងដំបូងនៅឆ្នាំ ១៩៤០ ហើយក៏បន្តទទួលបានជោគជ័យរហូតក្នុងរយៈពេល ៨ ទសវត្សរ៍មកនេះ បើទោះជាត្រូវយកមកផលិតឡើងវិញច្រើនលើកច្រើនសាយ៉ាងណាក្ដី។

សម្រាប់ភាពយន្ត 'Tom and Jerry' ថ្មីដែលត្រូវបានដឹកនាំកាផលិតដោយលោក Tim Story (ធីមស្តូរ៊ី) នឹងមានចាក់បញ្ចាំងតាមរោងកុនអាមេរិកមួយចំនួន និងនៅលើបណ្ដាញ HBO Max ចាប់ពីថ្ងៃទី ២៦ ខែកុម្ភៈ ខាងមុខនេះ ៕

ប្រែសម្រួល៖ វ៉ាន់ថន