ក្នុងសន្និសីទកាសែត នាព្រឹកថ្ងៃទី២៣ ខែកុម្ភៈនេះ តំណាងក្រសួងសុខាភិបាល និងនាយកវិទ្យាស្ថានប៉ាស្ទ័រកម្ពុជា បានបញ្ជាក់ដូចគ្នាថា ការរកឃើញមេរោគ ក្នុងសត្វប្រជៀវ ដែលក្រុមអ្នកស្រាវជ្រាវបារាំង បានរកឃើញកាលពី ១០ឆ្នាំមុននោះ មិនមែនជាមេរោគកូវីដ១៩ទេ ហើយក៏មិនអាចឆ្លងមកមនុស្សបានដែរ។ 

លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានបញ្ជាក់ជាថ្មីថា «អ្វីដែលគេសរសេរក្នុងអត្ថបទសិក្សារបស់គេនេះ បានបញ្ជាក់ថា វីរុស ដែលមាននៅក្នុងសត្វប្រជៀវនេះ វាមិនមែនជាវីរុសកូវីដ១៩ទេ។ វាជាបងប្អូនជីដូនមួយ និយាយឲ្យស្រួលយល់! វាជាបងប្អូនជីដូនមួយជាមួយនឹងវីរុស SAR Covid-2 តែវាមិនមែនជាវីរុសកូវីដ១៩ ទេ។ ទី២-អ្វីដែលគេរកឃើញ វាមានភាពខុសគ្នាស្រលះតែម្តង ត្រង់ស្បែកប្រូតេអ៊ីនរបស់វា ដែលវាមិនមានលទ្ធភាពក្នុងការចម្លងទៅមនុស្សនោះទេ។ មានន័យថា វាមានតែនៅក្នុងសត្វប្រជៀវនោះទេ ដែលវាក៏មិនមានលទ្ធភាពចម្លងមកមនុស្សដែរ ដោយសារតែអាស្បែកប្រូតេអ៊ីនរបស់វានោះឯង។ ទី៣-វីរុស ដែលគេរកឃើញក្នុងប្រជៀវនេះ ក៏មិនមែនជាវីរុសកូវីដ១៩ ដែលបំប្លែងថ្មីដែរ។ វាជាបងប្អូនជីដូនមួយរបស់ SAR Covid-2 តែវាមិនមែនជា SAR Covid-2 ទេ»។

នៅក្នុងសន្និសីទកាសែត លោកស្រីវេជ្ជបណ្ឌិត ឡូរ៉ង់ បារីល នាយកវិទ្យាស្ថានប៉ាស្ទ័រកម្ពុជា បានលើកឡើងថា ការស្រាវជ្រាវមេរោគលើសត្វប្រជៀវកាលពី១០ឆ្នាំមុន ដោយក្រុមវេជ្ជបណ្ឌិតបារាំងមួយក្រុមនោះ មិនមែនធ្វើតែនៅកម្ពុជាទេ តែនៅប្រទេសជាច្រើននៅអាស៊ី  ដូចជានៅប្រទេសថៃ ជាដើម គឺរកឃើញមេរោគសាកូវី នៅក្នុងសត្វប្រជៀវ។

លោកស្រីវេជ្ជបណ្ឌិត ឡូរ៉ង់ បារីល បានបញ្ជាក់ថា មេរោគក្នុងសត្វប្រជៀវ និងមេរោគកូវីដ១៩ គឺស្រដៀងគ្នា។ តែខុសគ្នា។ នោះគឺមេរោគក្នុងសត្វប្រជៀវ មិនមានលទ្ធភាពចម្លងទៅមនុស្សបានទេ៕

អត្ថបទ៖ ហ៊ុន ឌីណូ        រូបភាព៖ ឈាវ ថុកវីរៈ