កម្មវិធីដើរបង្ហាញម៉ូដសំលៀកបំពាក់ London Fashion Week នៅដើមឆ្នាំ ២០២១ នេះ បានរៀបចំឡើងជាលក្ខណៈអនឡាញទាំងស្រុង ដោយសារប្រទេសអង់គ្លេសមិនទាន់ដកចេញវិធានការបិទខេត្តក្រុងនៅឡើយ។

កម្មវិធីដើរបង្ហាញម៉ូដសំលៀកបំពាក់ London Fashion Week ដែលរៀបចំឡើងជាប្រភេទអនឡាញទាំងស្រុងនៅដើមឆ្នាំ ២០២១ នេះ បានចាប់ផ្ដើមប្រព្រឹត្តិទៅកាលពីចុងសប្ដាហ៍កន្លងទៅនេះ។

ការរៀបចំបែបអនឡាញនេះគឺដោយសារតែនៅប្រទេសអង់គ្លេសនៅបន្តអនុវត្តន៍វិធានការបិទខេត្ត/ក្រុងនៅឡើយដើម្បីទប់ស្កាត់ការរាលដាល និងឆ្លងជំងឺកូវីដ១៩។

ដូចនេះហើយកម្មវិធីបង្ហាញម៉ូដបានប្ដូរមកជាចាក់ផ្សាយផ្ទាល់តាមអនឡាញ មិនមានការចូលរួមផ្ទាល់ៗនោះឡើយ។ កម្មវិធីបង្ហាញម៉ូដនេះនឹងមានការចូលរួមពីម៉ាកសំលៀកបំពាក់បុរស និង នារីសរុបជិត ១០០ម៉ាក។

គួរបញ្ជាក់ថាវិស័យសំលៀកបំពាក់នៅអង់គ្លេសមិនត្រឹមតែរងផលប៉ះពាល់ខ្លាំងដោយសារការផ្ទុះជំងឺកូវីដ១៩ប៉ុណ្ណោះទេ ប៉ុន្តែវិបត្តិ Brexit (ប្រិចស៊ីត) ដែលជាដំណើរចាកចេញរបស់ចក្រភពអង់គ្លេសពីសហភាពអឺរ៉ុប ក៏បានបង្កផលប៉ះពាល់ខ្លាំងផងដែរ។ 

នៅដើមខែកុម្ភៈនេះ អ្នកជំនាញនៅក្នុងវិស័យម៉ូដជាង ៤៥០នាក់បានចុះហត្ថលេខាលើលិខិតចំហជូនរដ្ឋាភិបាល ដោយព្រមានថាវិស័យម៉ូដនៅអង់គ្លេសដែលបានរួមចំណែកដល់សេដ្ឋកិច្ចប្រទេសប្រមាណ ៤៩ពាន់លានដុល្លារក្នុងមួយឆ្នាំៗកំពុងប្រឈមមុខនឹងការខាតបង់ ដោយសារច្បាប់នៃការធ្វើដំណើរ និងកិច្ចការងារផ្លូវច្បាប់មួយចំនួនទៀតដែលរៀបចំឡើងជាថ្មី៕

ប្រែសម្រួល៖ វ៉ាន់ថន