ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
បើទោះជាកំពុងជួបវិបត្តិជម្ងឺកូវីដ-១៩ ជាសកលក្តី ការរួមចំណែក ពីផ្នែកឯកជន អភិវឌ្ឍន៍លើវិស័យអចលទ្រព្យ នៅមានជាបន្តបន្ទាប់ ស្របពេលដែលវិស័យនេះក្នុងប្រទេសកម្ពុជាយើង កំពុងមានការរីកចម្រើន ក្នុងនោះលំនៅដ្ឋានដូចជាវីឡា ខុនដូ បុរី បានឈានទៅរកភាពទំនើប និងស៊ីវីល័យតាមការរីកចំរើនរបស់ប្រទេសជាតិ។
នៅព្រឹកថ្ងៃ២២ ខែកុម្ភៈ ២០២១ ក្រុមហ៊ុនលន ស៊ីធី ឡូតធឺសស៊ីថោន ក្រុងព្រះសីហនុ ដែលគាំទ្រពីរដ្ឋបាលខេត្តព្រះសីហនុ បានធ្វើពិធីបញ្ចុះបឋមសិលាបើកការដ្ឋានសាងសង់ បុរី លំនៅដ្ឋាន មានទីតាំងក្នុងឃុំបិតត្រាង ស្រុកព្រៃនប់ខេត្តព្រះសីហនុ ត្រង់ចំណុចខាងលើចំណោតអូរត្រាវ ជាប់នឹងផ្លូវជាតិលេខ៤ ព្រំប្រទល់រវាងស្រុកព្រៃនប់និងទីប្រជុំជនក្រុងព្រះសីហនុ ។ ពិធីនេះប្រព្រឹត្តទៅក្រោមអធិបតីភាពឯកឧត្តម គួច ចំរើន អភិបាលខេត្តព្រះសីហនុ ក្នុងនោះក៍មានវត្តមានជាកិត្តិយស ពីសំណាក់ឯកឧត្តមអ្នកឧកញ៉ា លី យ៉ុងផាត់ សមាជិកព្រឹទ្ធសភា ព្រមទាំងវត្តមានឯកឧត្តម លោកជំទាវ លោក លោកស្រី តាមស្ថាបន័រដ្ឋនិងវិសយ័ឯកជន។
ឯកឧត្តម តុល លន ស្ថាបនិកក្រុមហ៊ុន លន ស៊ីធី ឡូតធឺសស៊ីថោន ក្រុងព្រះសីហនុ មានប្រសាសន៍ថា គម្រោងនេះនឹងអភិវឌ្ឍន៍លើផ្ទៃដីជិត ៦៦ ហិកតា ដែលមានការ សាងសង់ជាលំនៅដ្ឋាន ផ្ទះល្វែង បុរី វីឡា សម្រាប់លក់ជូនអតិថិជន និងសាងសង់បន្ថែម នូវហេដ្ឋារចនាសម្ពន្ធ័ផ្សេងៗទៀតរួមមាន សាលារៀន សួនច្បារ ស្ថានីយ៍ប្រេង ឥន្ទនៈ អាហារដ្ឋាននិងកន្លែងហាត់ប្រាណជាដើម ក្រោមទុនវិនិយោគរហូតដល់ ជាង ១០០លាន ដុល្លារអាមេរិក ក្នុងនោះក្រុមហ៊ុនក៍បានគោរពថ្លែងអំណរគុណដល់ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន ដែលបានដឹកនាំប្រទេសជាតិនាំមកនូវសុខសន្តិភាព បង្កឱកាសដល់ការវិនិយោគនិងការអភិវឌ្ឍន៍ប្រទេសជាតិ។
លោក រុណ រដ្ឋា នាយកប្រតិបត្តិគម្រោង លន ស៊ីធី ឡូតធឺសស៊ីថោន ប្រាប់ពីការសាងសង់នេះដែរថា ក្រុមហ៊ុននឹងសាងសង់នូវសំណង់លំនៅដ្ឋាន ផ្ទះវីឡា ព្រមទាំងហេដ្ឋារចនាសម្ពន្ធ័ផ្សេងៗ ដែលធានាគុណភាពស្តង់ដា តាមបទដ្ឋានវិស្វកម្មនិងស្ថាបត្យកម្ម ជាមួយនិងសោភ័ណ្ឌភាព និងភាពស៊ីវិល័យសម័យថ្មី ដើម្បីផ្តល់ជូនអតិថិជន។
មានប្រសាសន៍សំណេះសំណាលក្នុងពិធីនេះឯកឧត្តម គួច ចំរើន អភិបាលខេត្តព្រះសីហនុ លើកឡើងថា ទោះបីជាប្រទេសកម្ពុជា និងពិភពលោកព្រួយបារម្ភចំពោះជម្ងឺកូវីដ-១៩ក្តី ប៉ុន្តែចំពោះការវិនិយោគលើវិស័យអចលនៈទ្រព្យ និងការសាងសង់សំណង់ផ្ទះល្វែង វីឡា បុរី លំនៅដ្ឋានក្នុងប្រទេសកម្ពុជា ក៏ដូចជាក្នុងខេត្តព្រះសីហនុ នៅតែមានសកម្មភាពជាបន្តបន្ទាប់ ស្របពេលដែលខេត្តនេះគឺជាខេត្តតំបន់ឆ្នេរមួយមានការអភិវឌ្ឍន៍លើគ្រប់វិស័យ ទាំងហេដ្ឋារចនាសម្ព័ន្ធផ្លូវថ្នល់ ភ្លើងបំភ្លឺផ្លូវនិងសំណង់អាគារតូច ធំ ក្នុងក្រុងព្រះសីហនុ ក៏ដូចជាតាមតំបន់ទេសចរណ៍នានា ហើយមួយវិញទៀតខេត្តព្រះសីហនុ សំបូរទៅដោយរមណីយ៍ដ្ឋានទេសចរណ៍ដើម្បីអោយភ្ញៀវមកទស្សនា និងលេងកំសាន្ត។
ជាមួយនឹងការគាំទ្រ លើកទឹកចិត្តចំពោះដំណើរការអភិវឌ្ឍន៍របស់ក្រុមហ៊ុន លន ស៊ីធី ក្នុងខេត្តព្រះសីហនុ ឯកឧត្តមអភិបាលខេត្តព្រះសីហនុ ក៍បានណែនាំដល់ក្រុមហ៊ុនឲ្យយកចិត្តទុកដាក់ អនុវត្តន៍វិធានការ បង្ការទប់ស្កាត់ជំងឺកូវីដ១៩ តាមបច្ចេកទេសរបស់ក្រសួងសុខាភិបាលជាចាំបាច់នៅក្នុងការដ្ឋានផ្ទាល់ ស្របពេលដែលវិធានការ បង្ការ ទប់ស្កាត់ជំងឺកូវីដ១៩ កំពុងធ្វើឡើងគ្រប់ទីកន្លែង៕
អត្ថបទ៖ ហ៊ុន ប៊ុនឡេង រូបភាព៖ ឡេង ប៊ុននី