ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ស្នងការនគរបាលខេត្តកំពត លោកឧត្តមសេនីយ៍ទោ ម៉ៅ ចន្ទ័មធុរិទ្ធ ឲ្យដឹងថា នៅវេលាម៉ោងជិត៤ទៀបភ្លឺ ថ្ងៃទី ១៧ ខែកុម្ភៈ ឆ្នាំ២០២១ កម្លាំងវរៈសេនាតូច នគរបាលការពារព្រំដែនគោកលេខ ៦០១ សហការជាមួយកម្លាំងតំបន់សឹករងខេត្តកំពត បានឃាត់ខ្លួនមេខ្យល់ បុរសជនជាតិខ្មែរចំនួន២នាក់ ដែលបាននាំប្រជាពលរដ្ឋវៀតណាមចំនួន៣នាក់ (ស្រី២នាក់) ឆ្លងដែនខុសច្បាប់ចូលមកខេត្តកំពត តាមភូមិសាស្ត្រ ភូមិកោះចំការ ឃុំបឹងសាលាខាងត្បូង ស្រុកកំពង់ត្រាច ។
មេខ្យល់ បុរសជនជាតិខ្មែរ
ពលរដ្ឋវៀតណាម៣នាក់ឆ្លងដែនខុសច្បាប់
ក្រោយឃាត់ខ្លួន និងសាកសួរតាមនិតិវិធី សមត្ថកិច្ចបានប្រគល់ពលរដ្ឋវៀតណាមទាំង៣នាក់នោះ ជូនយោធាការពារព្រំដែនវៀតណាមវិញ ដើម្បីធ្វើចត្តាឡីស័ក និងបានសំណូមពរភាគីវៀតណាមក្រោយពេលធ្វើចត្តាឡីស័ករួច សូមផ្តល់លទ្ធផលនៃការធ្វើតេស្តនេះមកសមត្ថកិច្ចកម្ពុជាវិញ។ ដោយឡែកមេខ្យល់ជនជាតិខ្មែរទាំង២នាក់ សមត្ថកិច្ចបានកសាងសំណុំរឿង ដើម្បីអនុវត្តតាមនីតិវិធីច្បាប់។
លោកឧត្តមសេនីយ៍ទោស្នងការបញ្ជាក់បន្ថែមថា អនុវត្តតាមបទបញ្ជា របស់ប្រមុខរាជរដ្ឋាភិបាលកម្ពុជា សម្តេចអគ្គមហាសេនាបតីតេជោហ៊ុន សែន ដើម្បីទប់ស្កាត់ជំងឺ កូវីដ១៩ កម្លាំងសមត្ថកិច្ចគ្រប់ផ្នែក និងរដ្ឋបាលគ្រប់ថ្នាក់ក្នុងខេត្តកំពត បានធ្វើប្រតិបត្តិការត្រួតពិនិត្យ ចរាចរណ៍ចេញ ចូលនៅតាមច្រកព្រំដែនជាប់ប្រទេសជិតខាង ក៍ដូចជានៅតាមមូលដ្ឋាន ដើម្បីអនុវត្តវិធានការធ្វើចត្តាឡីស័ក៕
អត្ថបទ/រូបភាព៖ ហ៊ុយ ប៊ុនឡេង