ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
ប្រជាពលរដ្ឋពោរពេញដោយកំហឹងបានប្រមូលផ្ដុំគ្នានៅតាមផ្លូវនៅទីក្រុងទ្រីប៉ូលី ប្រទេសលីបង់ ខណៈប្រទេសនេះកំពុងស្ថិតនៅក្នុងដំណាក់កាលនៃការដាក់វិធានការបិទទ្វារតឹងរ៉ឹងបំផុតតាំងពីជំងឺ ខូវីដ១៩ បានចាប់ផ្ដើមផ្ទុះឡើងនៅក្នុងប្រទេសនេះ។ ក្រុមអ្នកតវ៉ាភាគច្រើនបាននិយាយថា វិធានការបិទទ្វារប្រទេសនេះកំពុងបង្កើនភាពក្រីក្ររបស់ពួកគេ ជាហេតុធ្វើឱ្យពួកគេខឹងសម្បារនិងតវ៉ាដោយបានដុតរថយន្ត និងគប់ដុំថ្មទៅលើកងទាហានដែលបានឆ្លើយតបវិញដោយបាញ់ឧស្ម័នបង្ហូរទឹកភ្នែកនិងគ្រាប់កាំភ្លើងកៅស៊ូទៅលើហ្វូងអ្នកតវ៉ា។
ប្រទេសមួយចំនួននៅទូទាំងពិភពលោកកំពុងរងសម្ពាធយ៉ាងខ្លាំងប៉ុន្តែវិបត្តិនេះគឺធ្ងន់ធ្ងរយ៉ាងខ្លាំងនៅក្នុងប្រទេសលីបង់ ដោយសារតែជំងឺរាតត្បាតនេះគឺជាដើមចមនៃការដួលរលំផ្នែកហិរញ្ញវត្ថុគួបផ្សំនិងការផ្ទុះកំពង់ផែដ៏ធំមួយកាលខែសីហាដែលធ្វើឱ្យប្រព័ន្ធសុខាភិបាលកាន់តែរងគ្រោះខ្លាំងថែមទៀត។
កាលពីថ្ងៃអង្គារ ប្រទេសលីបង់បានចុះបញ្ជីពីករណីថ្មីនៃការឆ្លងជំងឺខូវីដ១៩ចំនួន ៣៥០៥ នាក់ទៀតធ្វើឱ្យចំនួនឆ្លងសរុបបានកើនឡើងដល់ ២៨៥៧៥៤ នាក់ក្នុងនោះចំនួន ២៤៧៧ នាក់បានស្លាប់ នៅក្នុងប្រទេសដែលមានចំនួនប្រជាជនសរុបប្រហែល ៦ លាននាក់មួយនេះ៕
ប្រែសម្រួល៖ SN
