ក្មេងប្រុសឈ្មោះ ក្រាហេម សេម៉ា អាយុ ៧ ឆ្នាំជនជាតិអ៊ូហ្គង់ដាទទួលបានភាពល្បីល្បាញនៅក្នុងប្រទេស​របស់គាត់ជាមួយការបង្ហាញ​ចំណេះដឹងផ្នែកយន្ដហោះនិងជំនាញហោះហើរយ៉ាងស្ទាត់ជំនាញរបស់គាត់។ ប្រព័ន្ធផ្សព្វផ្សាយមូលដ្ឋានមួយចំនួនបានសម្ភាសកុមារ ក្រាហេម សេម៉ា ធ្វើឱ្យកុមារនេះមានភាពល្បីល្បាញនៅលើ​ទំព័រកាសែតនិងប្រព័ន្ធផ្សព្វផ្សាយសង្គម​ជាមួយរហស្សនាមថា «កាពីទែន (Captain)»។

ក្នុងឯកសណ្ឋានជាបើកយន្តហោះ កុមារ សេម៉ា បាននិយាយថា គាត់អ្នកស្រឡាញ់ចូល​ចិត្តគណិតវិទ្យានិងវិទ្យាសាស្ត្រ ហើយកុមាររូប​នេះក៏ធ្លាប់បានចូលរួមក្នុងការហ្វឹកហាត់បើកយន្តហោះ Cessna ១៧២ ចំនួន ៣ លើកនៅក្នុងប្រទេសអ៊ូហ្គង់ដា ហើយ​ឯកអគ្គរដ្ឋទូតអាឡឺម៉ង់និងរដ្ឋមន្រ្តីដឹកជញ្ជូនប្រទេសអ៊ូហ្គង់ដា ក៏​បានអញ្ជើញកុមាររូបនេះឱ្យចូលរួមក្នុងកិច្ចប្រជុំសំខាន់ៗផងដែរ។​។

អ្នកបើកយន្តហោះក្មេងខ្ចីរូបនេះ បានបញ្ជាក់ពីគោលបំណងរបស់គាត់ថា គាត់ចង់ក្លាយជាអ្នកបើក​យន្តហោះ និងអវកាសយានិក ដែលថ្ងៃណាមួយ​គាត់អាចនឹងធ្វើដំណើរទៅកាន់ភពព្រះអង្គារ  ហើយកុមាររូបនេះក៏មានក្ដីស្រមៃចង់ចាប់ដៃជាមួយលោក អេឡុន ម៉ាស និងរៀនសូត្រ​យក​គម្រូតាមលោក ម៉ាស ផងដែរ។ សូមបញ្ជាក់ថា លោក ម៉ាស គឺជាអ្នកបង្កើតក្រុមហ៊ុនអវកាស SpaceX នៅសហរដ្ឋអាមេរិក ហើយថ្មីៗនេះក្រុមហ៊ុនរបស់លោកបានបាញ់បង្ហោះគ្រាប់រ៉ុក្កែតឯកជនចំនួន ២ គ្រឿងទៅកាន់ដែនអវកាស​ដើម្បីសិក្សាពីភពព្រះអង្គារ​បន្តទៀត​ព្រោះនៅក្នុងពេលអនាគត លោក ម៉ាស ចង់បញ្ជូនមនុស្សលោកឱ្យទៅលេងឬរស់នៅលើភពនេះ​៕

ប្រែ​សម្រួល៖ បុិច សុីនួន