ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ក្រុមការងារចម្រុះ រាជធានី-ខេត្ត ដឹកនាំដោយមន្ត្រីពន្ធដារ រួមសហការជាមួយអាជ្ញាធរមានសមត្ថកិច្ចថ្នាក់ក្រោមជាតិ នឹងចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ២០២០ នៅតាមគោលដៅមួយចំនួន លើកំណាត់ផ្លូវសំខាន់ៗ នៃរាជធានី-ខេត្ត ចាប់ពីថ្ងៃទី១ ខែកុម្ភៈ ឆ្នាំ២០២១តទៅ។ នេះបើតាមអគ្គនាយកដ្ឋានពន្ធដារ។
ក្នុងសេចក្តីប្រកាសរបស់អគ្គនាយកដ្ឋានពន្ធដារ ចុះថ្ងៃទី១១ ខែមករា ឆ្នាំ២០២១ បានឲ្យដឹងថា សម្តេចតេជោ នាយករដ្ឋមន្ត្រី ហ៊ុន សែន កាលពីថ្ងៃទី៣០ ខែធ្នូ ឆ្នាំ២០២០ បានចារឯកភាពលើឯកសាររបស់ក្រសួងសេដ្ឋកិច្ច និងហិរញ្ញវត្ថុ ដើម្បីចុះពិនិត្យ និងចាប់អ្នកមិនបង់ពន្ធផ្លូវ លើយានជំនិះ និងមធ្យោបាយដឹកជញ្ជូនគ្រប់ប្រភេទ។
អគ្គនាយកដ្ឋានពន្ធដារ បានបញ្ជាក់ថា ក្នុងករណីម្ចាស់យានយន្តខកខានមិនបានប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ២០២០កន្លងទៅ សូមមេត្តារួសរាន់អញ្ជើញទៅប្រកាសបង់ពន្ធ និងបង់ប្រាក់ពិន័យតាមច្បាប់ជាធរមាន នៅអគ្គនាយកដ្ឋានពន្ធដារ ឬនៅតាមសាខាពន្ធដារខេត្ត-ខណ្ឌ ឬនៅសាខាធនាគារកាណាឌីយ៉ា អេស៊ីលីដា ធនាគារវឌ្ឍនៈ កម្ពុជាសាធារណៈ ជេ ត្រាស់ រ៉ូយ៉ាល់ ឬនៅសាខាធនាគារ ស្ថាបនា។
អគ្គនាយកដ្ឋានពន្ធដារ សង្ឃឹមថា ម្ចាស់យានយន្តទាំងអស់ នឹងយកចិត្តទុកដាក់គោរពកាតព្វកិច្ចសារពើពន្ធ និងរួសរាន់ទៅប្រកាសបង់ពន្ធឲ្យបានគ្រប់ៗគ្នា និងបានទាន់ពេលវេលា ដើម្បីចៀសវាងក្រុមការងារចម្រុះ រួមសហការជាមួយអាជ្ញាធរមានសមត្ថកិច្ច ថ្នាក់ក្រោមជាតិ ធ្វើការឃាត់តាមដងផ្លូវតម្រូវឲ្យបង់ប្រាក់ពន្ធ ដែលនាំឲ្យខាតពេលវេលា និងកកស្ទះចរាចរណ៍ដែលអាចកើតមាននូវបាតុភាពអសកម្មដោយប្រការណាមួយជាយថាហេតុ។
សូមរម្លឹកថា ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ២០២០ បានផុតកំណត់កាលពីថ្ងៃទី៣០ ខែវិច្ឆិកា ឆ្នាំ២០២០។
ការប្រមូលពន្ធលើមធ្យោបាយដឹកជញ្ជូនគ្រប់ប្រភេទ ប្រចាំឆ្នាំ២០២០ បានកើនឡើងលើសផែនការ ជាង ៣៥% ក្នុងចំណោមយានយន្តជាង ៧៣ម៉ឺនគ្រឿង ក្នុងនោះ មានរថយន្តចុះបញ្ជីថ្មី ចំនួនជាង ៩ម៉ឺន ៩ពាន់គ្រឿង។
ក្នុងពេលកម្លាំងចម្រុះ ចុះចាប់អ្នកមិនបង់ពន្ធផ្លូវ ចាប់ពីថ្ងៃទី១ ខែកុម្ភៈតទៅ ម្ចាស់យានយន្ត នឹងត្រូវរងការផាកពិន័យ។ ដោយឡែក សម្រាប់ម៉ូតូគ្រប់ប្រភេទ មិនជាប់កាតព្វកិច្ច បង់ពន្ធផ្លូវឡើយ ដោយរាជរដ្ឋាភិបាល បានលើកលែងជាយូរឆ្នាំមកហើយ៕
អត្ថបទ៖ អឿន ភារ៉ា រូបភាព៖ ឯកសារ