ថ្ងៃសុក្រ ទី២៩ ខែមីនា ឆ្នាំ២០២៤

ក្រសួងការងារប្រកាសអោយកម្មករនយោជិតជាង ១២,០០០នាក់ ទៅបើកប្រាក់ឧបត្ថម្ភ លើកទី៤១ និងលើកទី៤២

១៨ ធ្នូ ២០២០ | ព័ត៌មានជាតិ

នៅថ្ងៃព្រហស្បតិ៍នេះ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសពីការបើកប្រាក់ឧបត្ថម្ភ ជូនកម្មករនិយោជិតជាង១២,០០០នាក់នៅរោងចក្រ សហគ្រាសចំនួន៧៧ ក្នុងវិស័យកាត់ដេរ និងវិស័យទេសចរណ៍ ដែលត្រូវបានព្យួរកិច្ចសន្យាការងារ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល ក្នុងដំណាក់កាលរងវិបត្តិកូវីដ-១៩។

 

 


ក្នុងចំណោមបងប្អូនកម្មករទាំងជាង ១២,០០០នាក់ មកពីរោងចក្រសហគ្រាសទាំង៧៧ ដែលព្យួរការងារនេះ គឺវិស័យកាត់ដេរភាគច្រើននៅរាជធានីភ្នំពេញ ខណៈវិស័យទេសចរណ៍ ភាគច្រើននៅខេត្តសៀមរាប ។ មិនខុសពីសព្វដង ប្រាក់ឧបត្ថម្ភរបស់រាជរដ្ឋាភិបាលនឹងត្រូវបើកផ្តល់ ជាប្រាក់រៀល និងអាស្រ័យលើចំនួនថ្ងៃនៃការព្យួរកិច្ចសន្យាការងារ ដោយកម្មករនយោជិតទទួលបានចាប់ពី១៥ដុល្លារដល់៤០ដុល្លារអាមេរិក។


បើតាមសេចក្ដីជូនដំណឹងរបស់ក្រសួងការងារ ប្រសិនបើកម្មករនយោជិតមិនបានទៅបើកប្រាក់ក្នុងការកំណត់១០ថ្ងៃបន្ទាប់ពីបានទទួលសារតាមទូរសព្ទដៃពីជាដៃគូទេនោះ ធនាគារនឹងបង្វិលប្រាក់ឧបត្ថម្ភនេះមកកាន់រាជរដ្ឋាភិបាលវិញ ។ កម្មករនយោជិតអាចបើកប្រាក់ឧបត្ថម្ភបាន តម្រូវអោយភ្ជាប់ជាមួយនូវអត្តសញ្ញាណបណ្ណសញ្ជាតិខ្មែរ និងទូរសព្ទដែលទទួលបាន សារនោះទៅ កាន់ភ្នាក់ងាររបស់ធនាគារ ដោយគ្មានចំណាយបង់ថ្លៃសេវាអ្វីឡើយពេលបើកប្រាក់ឧបត្ថម្ភនេះ។

 


ដោយឡែក ក្នុងករណីកម្មករនិយោជិតរោងចក្រ សហគ្រាសទាំង ៧៧នេះ មិនបានទទួលសារទូរសព្ទ ពីធនាគារដៃគូរបស់រាជរដ្ឋាភិបាលទេនោះ កម្មករនយោជិតអាចសួរព័ត៌មានបន្ថែម ឬធ្វើបច្ចុប្បន្នភាពលេខទូរសព្ទរបស់ខ្លួនទៅរដ្ឋបាល រោងចក្រសហគ្រាសរបស់ខ្លួនជាបន្ទាន់ ដើម្បីដោះស្រាយបញ្ហានេះ។


បើតាមមន្ត្រីជាន់ខ្ពស់ក្រសួងការងារ ឯកឧត្ដម ហេង សួរ គិតចាប់ពីខែកុម្ភៈ រហូតដល់ពេលនេះ រាជរដ្ឋាភិបាលបានចំណាយថវិកាជាច្រើនលានដុល្លារហើយ បើកជូនដល់បងប្អូនកម្មករនយោជិតក្នុងវិស័យវាយនភណ្ឌ និងទេសចរណ៍ ដែលត្រូវបានព្យូរកិច្ចសន្យាការងារដោយសារតែឥទ្ធិពលវិបត្តិកូវីត១៩។ វិបត្តិជំងឺសកលកូវីត១៩ បានធ្វើអោយការនាំចេញផលិតផលសំលៀកបំពាក់ និងស្បែែកជើងពីកម្ពុជាទៅកាន់ទីផ្សារអឺរ៉ុប និងសហរដ្ឋអាមេរិកមានការធ្លាក់ចុះ រោងចក្រកាត់ដេរមួយចំនួនបានព្យូរកិច្ចសន្យាការងារដល់កម្មករនយោជិត។

 


បើតាមអ្នកនាំពាក្យដដែល បច្ចុប្បន្នរោងចក្រដែលបានព្យូរការងារជាប្រចាំថ្ងៃមានការថយចុះច្រើន ធ្វើអោយកម្មករនយោជិត ដែលត្រូវបានព្យូរកិច្ចសន្យាការងារនៅសល់តែប្រមាណ៥ម៉ឺននាក់ប៉ុណ្ណោះ ដែលមានការធ្លាក់ចុះដូចគ្នា។ 

 


សូមបញ្ជាក់ថា កន្លងមកប្រមុខរាជរដ្ឋាភិបាល បានបញ្ជាក់ថា រាជរដ្ឋាភិបាលបានត្រៀមកញ្ចប់ថវិកាចំនួន ៨០០-២០០០លានដុល្លារ រួចជាស្រេច ដើម្បីទប់ទល់នូវវិបត្តិកូវីដ១៩ រយៈពេលវែង ។ ហើយរាជរដ្ឋាភិបាលនៅតែបន្តផ្ដល់ប្រាក់ឧបត្ថម្ភដល់កម្មករនយោជិតដែលរងការព្យូរកិច្ចសន្យាការងាររហូតទាល់តែមានសេចក្ដីសម្រេចជាថ្មី៕

 

អត្ថបទ៖ សំ ជំនាញ, រូបភាព៖ និន សុខលី 
 

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2024