ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
ចាន់ វឌ្ឍនាកា ដែលមានរហស្សនាមថា CV11 បានក្លាយជាទូតសុឆន្ទៈ (Brand Ambassador) ក្រុមហ៊ុនសេវាទូរគមនាគមន៍ Seatel ជាផ្លូវការហើយ កាលពីរសៀល ថ្ងៃច័ន្ទ ទី១១ ខែមករា ឆ្នាំ២០១៦ ហើយក៏ជាកីឡាករទូតសុឆន្ទៈ ចំណូលច្រើនជាងគេ ដោយទទួលបាន ២៥០០០ដុល្លារ ជាថ្នូរ ស៊ីញ៉េកុងត្រា រួមនឹង ទូរសព្ទទំនើប១គ្រឿង អាចប្រើអ៊ិនធឺណេត មិនគិតប្រាក់ផងដែរ។
កីឡាករល្អប្រចាំ Mekong Clup Championship 2015 ក្នុងពិធីស៊ីញ៉េកុងត្រា នៅការយាល័យក្រុមហ៊ុន ម្សិលមិញ ថាជាមោទនភាពដែល ក្រុមហ៊ុនសេវាអ៊ិនធឺណេត និងទូរសព្ទមួយនេះ ជ្រើសរើសជាអ្នកតំណាង។ វឌ្ឍនាកា បេជ្ញាថានឹងវិវឌ្ឍខ្លួន បន្ថែមទៀត ទន្ទឹងប្រជាប្រិយភាព កើនឡើង។ ៖«ខ្ញុំនឹងព្យាយាម ឲ្យកាន់តែខ្លាំង ជាងឆ្នាំចាស់ ហើយខ្ញុំនឹងព្យាយាម ដើម្បីភាពជោគជ័យ បន្ថែមទៀត»។
អគ្គនាយករងក្រុម Seatel លោក Yang Liqun ពន្យល់ថា ក្រុមហ៊ុនលោក បានផ្ដល់ជូនសេវា ទូរសព្ទដ៏ឥតខ្ចោះ និងអ៊ីធឺណេត 4G មានល្បឿនលឿន ហើយ ម្ចាស់ស្បែកជើងមាស MCL ២០១៥ រូបនេះ ជាខ្សែប្រយុទ្ធវ័យក្មេង ដ៏មានសមត្ថភាពស័ក្តសមនឹងតំណែង ទូតឆន្ទៈក្រុមហ៊ុន។ ៖ «ចាន់ វឌ្ឍនាកា ជាខ្សែប្រយុទ្ធដ៏ឆ្នើម នៅលើទីលាន មានល្បឿនលឿន ពុះពារគ្រប់ឧបស័គ្គ។ ស្មារតីលើទីលាន គាត់មិនបោះបង់ ការតស៊ូងាយៗឡើយ។ គាត់ជាយុវវ័យ គឺស្របនឹងស្មារតីរបស់ Seatel ដែលបង្កើតអ្វីដែលថ្មី សេវាដ៏អស្ចារ សម្រាប់កម្ពុជា។ នេះជាហេតុផល ដែលយើងជ្រើសរើស វឌ្ឍនាកា ហើយយើងសង្ឃឹមថា ការសហការនេះ នឹងជោគជ័យ ទាំងសងខាង»។
ខ្សែប្រយុទ្ធដែលស៊ុត ៣៧គ្រាប់ ឈ្នះស្បែកជើងមាស លីករដូវកាលមុនរូបនេះ បានគ្រងតំណែង ទូតសុឆន្ទៈថ្មីម្នាក់ទៀត បន្ទាប់ពី ឃួន ឡាបូរ៉ាវី កួច សុកុម្ភៈ និង ប្រាក់ មុនីឧត្ដម ដែលត្រូវក្រុមហ៊ុនមួយចំនួន ជ្រើសរើសជា អ្នកតំណាងកាលឆ្នាំមុន។ អ្នកចាត់ការទូទៅក្លិប បឹងកេតអង្គរ លោក បែ មករា លើកឡើងថា៖ «ជាមុខមាត់បង្ហាញថា បាល់ទាត់កម្ពុជា ទទួលការចាប់អារម្មណ៍ ពីក្រុមហ៊ុន និងអ្នកឧបត្ថម្ភផ្សេង។ វាជាកម្លាំងជម្រុញក្មេង ឲ្យប្រឹងប្រែង បើគាត់ចង់ដូច ចាន់ វឌ្ឍនាកា ចឹងគាត់ត្រូវប្រឹងប្រែង ទាំងលើទីលាននិង ក្រៅទីលាន ដើម្បីបានឱកាសដូច វឌ្ឍនាកា ពេលនេះ»។
