សមាជិកមួយចំនួន នៃក្រុមបាល់ទាត់ ជម្រើសជាតិកម្ពុជា បានបង្ហាញអារម្មណ៍ តានតឹងខ្លះៗ ពេលទៅដល់ទឹកដីបង់ក្លាដែស ជាទីដែលពួកគេ ត្រូវចូល​រួមប្រកួតពានរង្វាន់ Gold Cup 2016 ចាប់ពីថ្ងៃទី០៨ ខែមករា ដល់ថ្ងៃទី២០។ ឆ្លើយឆ្លងជាមួយនឹង ភ្នាក់ងារគេហទំព័រ Keila Daily ខ្សែការពារ ហុង ផេង បង្ហើបថា គេនឹកស្មានមិនដល់ថា ស្ថានភាពរស់នៅ ក្នុងប្រទេស​បង់ក្លាដែស ​មើលទៅលំបាកជាង កម្ពុជាទៅទៀត។ សមាជិកក្លឹបបឹងកេតអង្គរ បញ្ជាក់ដូច្នេះ ៖’’មិនពិបាកអីប៉ុន្មានទេ គ្រាន់តែថា ឃើញប្រទេសគេ ដូចរាងយ៉ាប់ជាងយើង ហ្នឹងណាបើនៅតាមផ្លូវវិញ មនុស្ស​ច្រើននោះច្រើន អញ្ចឹងទៅដូចរាងចង់ខ្លាច’’។

ចំណែកមិត្តរួមក្រុម មួយចំនួនបានរៀបរាប់ថា ទាំងម្ហូបអាហារ ទាំងអាកាសធាតុ ជា​​ពិសេសការ​បរិភោគ និង រស់នៅផងដែរដែល អាចធ្វើឲ្យប៉ះពាល់ ​ដល់អារម្មណ៍ពួកគេយ៉ាងខ្លាំង។ បង់ក្លាសដែសស្ថិតក្នុងចំណោម ប្រទេសមាន ប្រជាជនច្រើនជាងគេលើលោក និង ជាប្រទេស ដែលមានសេដ្ឋកិច្ច កំពុងអភិវឌ្ឍ។ បច្ចុប្បន្ន ប្រជាជន​ប្រមាណ​​​ ២៦ភាគរយ រស់នៅក្រោម បន្ទាត់ភាពក្រីក្រ៕