ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
ប៉ូលិសនៅទីក្រុង បាសែឡូណា ប្រទេសអេស្ប៉ាញ បានដាក់កម្លាំងល្បាតរបស់ខ្លួនចំនួន ១៦០ នាក់នៅតាមផ្លូវដើម្បីអនុវត្តបំរាមគោចរណ៍ពេលរាត្រីថ្មីដែលបានចូលជាធរមានកាលពីថ្ងៃអាទិត្យ ហើយបំរាមនេះគឺចាប់ពីម៉ោង ១០ ល្ងាចដល់ម៉ោង៦ព្រឹក។ មន្ត្រីប៉ូលិសឈ្មោះ អាល់ប៊ឺត អាតេរ៉ូ បាននិយាយថា ប៉ូលិសនឹងបំពេញការងារដោយផ្ដោតលើការអប់រំសាធារណជនអំពីវិធានការថ្មីនេះ ខណៈដែលច្បាប់ស្ដីពីការដាក់ប្រទេសក្នុងស្ថានភាពអាសន្នទើបតែបានបង្កើតឡើងកាលពីព្រឹកថ្ងៃអាទិត្យ។ កងកម្លាំងប៉ូលិសបានដើរល្បាតតាមផ្លូវនៅទីក្រុង បាសេឡូណា យ៉ាងខ្ជាប់ខ្ជួន។
ច្បាប់ស្ដីពីស្ថានភាពគ្រាអាសន្នដែលនឹងដាក់ឲ្យសភាអនុម័តមិនលើសពីរយៈពេល១៥ថ្ងៃនោះតម្រូវឲ្យតំបន់ទាំងអស់លើកលែងតែប្រជុំកោះខាណារី ចេញត្រូវដាក់បំរាមគោចរណ៍ពេលរាត្រីនិងកំណត់ការជួបជុំគ្នាមិនឲ្យលើសពីចំនួន៦នាក់។
តួលេខរដ្ឋាភិបាលមូលដ្ឋានបានបង្ហាញថា តាំងពីថ្ងៃទី១៨ ខែតុលា មកដល់ពេលនេះ តំបន់កាតាឡូនីមានករណីឆ្លងខូវីដ ១៩ សរុបចំនួន ២៣ ៦៨៦ នាក់ ហើយនៅចន្លោះពីថ្ងៃទី១៨ ដល់ ទី២៣ខែតុលា មានអ្នកស្លាប់ចំនួន ១៥៥ នាក់៕
ប្រែសម្រួល៖ SN