ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍ថា រដ្ឋាភិបាលក្រុងម៉ូស្គូជឿថា មនុស្សចំនួនជិត ៥ ០០០ នាក់បានស្លាប់ក្នុងការប្រយុទ្ធគ្នារវាងកងកម្លាំងប្រទេសអាស៊ែបៃហ្សង់ និងជនជាតិភាគតិចអាម៉េនីនៅតំបន់ណាហ្គូណូការ៉ាបាក។
លោក ពូទីន បានប្រាប់កិច្ចប្រជុំនៃក្លិបពិភាក្សា វ៉ាល់ដៃ (Valdai Discussion Club) ថា ទាំងភាគីអាស៊ែបៃហ្សង់និងអាម៉េនីគឺមានអ្នកស្លាប់និងរបួសយ៉ាងច្រើនដោយភាគីនីមួយៗអាចមានចំនួនជាង ២ ០០០ នាក់។ លោក ពូទីន បានបន្ថែមទៀតថា លោកបានជជែកតាមទូរស័ព្ទជាមួយក្រុមមេដឹកនាំនៃប្រទេសអាម៉េនី និងអាស៊ែបៃហ្សង់ជាច្រើនលើកច្រើនសារមកហើយ។
តំបន់ណាហ្គូណូការ៉ាបាកបាននិយាយថា បុគ្គលិកយោធារបស់ខ្លួនចំនួន ៨៧៤ នាក់បានស្លាប់តាំងពីថ្ងៃទី២៧ ខែកញ្ញា ហើយជនស៊ីវិលមានចំនួន ៣៧ នាក់ចំណែកឯប្រទេសអាស៊ែបៃហ្សង់វិញបាននិយាយថា ជនស៊ីវិលប្រទេសនេះចំនួន ៦១ នាក់បានស្លាប់ ហើយចំនួន ២៩១ នាក់ទៀតបានរងរបួសប៉ុន្តែមិនបានបញ្ជាក់ពីអ្នកស្លាប់និងរបួសនៃយោធារបស់ខ្លួននោះទេ។
ក្ដីសង្ឃឹមនៃការបញ្ចប់ការបង្ហូរឈាមរយៈពេល១ខែនៅតំបន់ភ្នំណាហ្គូណូការ៉ាបាកនេះមើលទៅរាងយ៉ាប់បន្តិចកាលពីថ្ងៃព្រហស្បតិ៍ដោយសារកងកម្លាំងអាស៊ែបៃហ្សង់ និងអាម៉េនីបានប្រយុទ្ធគ្នាជាថ្មីនៅមុនពេលមួយថ្ងៃនៃកិច្ចចរចានៅក្នុងទីក្រុងវ៉ាស៊ីងតោនសហរដ្ឋអាមេរិក៕
ប្រែសម្រួល៖ SN