ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ថ្ងៃព្រហស្បតិ៍ ទី២៨ ខែមីនា ឆ្នាំ២០២៤
ពាក់ព័ន្ធនឹងស្ថានការណ៍វិវត្តចុងក្រោយនៃជំងឺ ខូវីដ១៩ នៅជុំវិញពិភពលោក។ គិតត្រឹមល្ងាចថ្ងៃព្រហស្បតិ៍ម្សិលមិញនេះ ចំនួនអ្នកឆ្លងជំងឺ ខូវីដ១៩ សរុបបានកើនឡើងដល់ជាង៤១លាន ៥សែននាក់ (41,519,351)។ ចំណែកអ្នកស្លាប់កើនឡើងដល់ជាង១លាន ១សែន ៣ម៉ឺននាក់ ៦ម៉ឺននាក់ (1,136,463)។
នៅប្រទេសថៃថ្ងៃព្រហស្បតិ៍ ក្រសួងសុខាភិបាលរកឃើញអ្នកឆ្លងថ្មី១០នាក់ទៀត ជាករណីនាំចូល។ ពួកគេធ្វើដំណើរពីប្រទេសហូឡង់ ចក្រភពអង់គ្លេស យេម៉ែន បែលហ្សិក ជប៉ុន តួកគី និងកោះតៃវ៉ាន់។
ដោយឡែក ករណីឆ្លងនៅក្នុងសហគមន៍ ដែលកើតឡើងនៅតំបន់ជាប់នឹងព្រំដែនប្រទេសមីយ៉ាន់ម៉ានោះ ហាក់ដូចជាស្ងប់ស្ងាត់ទៅវិញ។ ប៉ុន្តែសម្រាប់មីយ៉ាន់ម៉ា ស្ថានភាព ខូវីដ១៩ នៅតែបន្តឆ្លងរាលដាលនៅក្នុងសហគមន៍។ ថ្ងៃនេះ ក្រសួងសុខាភិបាលមីយ៉ាន់ម៉ារកឃើញអ្នកឆ្លងថ្មីចំនួន១១៩៤នាក់ និងស្លាប់២៧នាក់។
នៅវៀតណាម ក្រសួងសុខាភិបាលរកឃើញអ្នកឆ្លង៣នាក់ទៀត ដែលធ្វើឲ្យចំនួនអ្នកឆ្លងសរុបកើនឡើងដល់១១៤៦នាក់។
នៅឥណ្ឌា ក្រសួងសុខាភិបាលរកឃើញអ្នកឆ្លងថ្មីជាង៥ម៉ឺន ៥ពាន់នាក់ ដែលជាអត្រាឆ្លងប្រចាំថ្ងៃទាបបំផុតចាប់តាំងពីថ្ងៃទី២២ ខែកញ្ញា។ អត្រាឆ្លងរាលដាលនៅប្រទេសឥណ្ឌាបានឈានដល់កម្រិតកំពូល ហើយអាចនឹងធ្លាក់ចុះមកវិញដោយសន្សឹមៗរហូតដល់កម្រិតថេរត្រឹមខែកុម្ភៈ ឆ្នាំ២០២១។ ខាងលើនេះជាការអះអាងរបស់អ្នកវិទ្យាសាស្ត្រ។
បើគេក្រឡេកទៅមើលទ្វីបអឺរ៉ុបវិញម្ដង។ នៅប្រទេសអាល្លឺម៉ង់ ក្រសួងសុខាភិបាលរកឃើញអ្នកឆ្លងថ្មីជាង១ម៉ឺន ២ពាន់នាក់ ដែលជាករណីឆ្លងប្រចាំថ្ងៃដ៏ខ្ពស់បំផុត។ រដ្ឋមន្ត្រីក្រសួងសុខាភិបាលអាល្លឺម៉ង់ប្រកាសថា លោកបានឆ្លងជំងឺ ខូវីដ១៩ កាលពីពេលថ្មីៗនេះ។ ដូច្នេះ លោកត្រូវដាក់ខ្លួននៅដាច់ពីគេ។
នៅតំបន់អឺរ៉ុបខាងលិច អេស្ប៉ាញបានក្លាយជាប្រទេសទី១ ដែលមានអ្នកឆ្លងសរុបកើនឡើងដល់ជាងមួយលាននាក់។ អត្រាឆ្លងរាលដាលប្រចាំថ្ងៃនៅតែមានកម្រិតខ្ពស់ដដែលនៅអេស្ប៉ាញ ទោះបីអាជ្ញាខំប្រឹងទប់ស្កាត់យ៉ាងណាក៏ដោយ។ ឧទាហរណ៍ អាជ្ញាធរដាក់បម្រាមគោចរ ឬបិទតំបន់ខ្លះនៃទីក្រុងម៉ាឌ្រីត។
ប្រទេសរុស្ស៊ីនៅតែមានអត្រាឆ្លងរាលដាលខ្ពស់ជានិច្ច ជាមួយនឹងអ្នកឆ្លងថ្មីជាង១ម៉ឺន ៥ពាន់នាក់។ ទោះជាយ៉ាងណាក្ដី លោកពូទីនមិនមានគម្រោងបិទប្រទេស ឬបិទតំបន់ដូចការព្រួយបារម្ភទេ។ លោកថ្លែងថាអ្វីដែលជារឿងសំខាន់ និងជាអាទិភាពនៅពេលនេះ គឺការចាក់វ៉ាក់សាំងសម្រាប់ពលរដ្ឋរុស្ស៊ីជាទូទៅ។ ដូច្នេះ រុស្ស៊ីត្រូវបម្រុងវ៉ាក់សាំងសម្រាប់ផ្ដល់ជូនពលរដ្ឋរបស់ខ្លួន។ ចំណែកការលក់វ៉ាក់សាំងទៅឲ្យប្រទេសដៃ ចាំគិតគ្នានៅពេលក្រោយទៀត៕
ប្រែសម្រួល៖ អន សំអាង