តំបន់កម្សាន្តចំនួនពីរបានក្លាយជាគោលដៅទេសចរថ្មីរបស់ភ្ញៀវទេសចរចិន នៅអំឡុងរដូវស្លឹកឈើជ្រុះ និងអំឡុងពេលដែលមានការធ្លាក់ភ្លៀងច្រើននៅក្នុងពេលប៉ុន្មានថ្ងៃកន្លងទៅនេះផងដែរ។

រដូវស្លឹកឈើជ្រុះបានប្រែក្លាយវាលស្មៅនៅតំបន់ Narat (ណារ៉ាត) ភាពពាយព្យនៃតំបន់ Xinjiang (ស៊ីនជាំង) ប្រទេសចិន ជាទីវាលដ៏ស្រស់ស្អាតមួយ ដែលអាចទាក់ទាញភ្ញៀវទេសចរមកពីទូទាំងប្រទេសមករីករាយកម្សាន្ត។

ភ្ញៀវទេសចរអាចបើកបរក្នុងតំបន់ Narat (ណារ៉ាត) និងកម្សាន្តជាមួយទេសភាពដើមឈើ រួមទាំងព្រៃភ្នំដែលស្រស់ស្អាតប្រៀបដូចជាផ្ទាំងគំនូរ។

តំបន់ដ៏ស្រស់ត្រកាលមួយនេះក៏មានផ្ដល់ជូននូវការកម្សាន្តមួយចំនួនដូចជាការជិះសេះ និងការជិះរថយន្តប្រណាំងផងដែរ ហើយនៅតំបន់នេះដែរសណ្ឋាគារឈ្មោះថា B and B ជាសណ្ឋាគារដ៏ពេញនិយមមួយសម្រាប់ភ្ញៀវទេសចរ។

ក្រៅពីតំបន់ Narat (ណារ៉ាត) នេះ ភ្ញៀវទេសចរនៅប្រទេសចិនក៏ចាប់អារម្មណ៍នឹងតំបន់កម្សាន្តមួយទៀតនៅភាគខាងជើងនៃខេត្ត Shanxi (សានស៊ី) ដែលនៅទីនោះមាននូវទឹកធ្លាក់ឈ្មោះថា Hukou (ហ៊ូកូវ)។

ភ្លៀងធ្លាក់រយៈពេលប៉ុន្មានថ្ងៃនេះ ធ្វើឲ្យមានកម្លាំងទឹកហូរខ្លាំង ដែលភ្ញៀវទេសចរពេញចិត្តនឹងទិដ្ឋភាពបែបនេះខ្លាំងបំផុត ៕

ប្រែសម្រួល៖ វ៉ាន់ថន