ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
នៅក្នុងរយៈពេល២០ឆ្នាំមកនេះ ការវិនិយោគសំណង់នៅក្នុងប្រទេសកម្ពុជា ពីសំណាក់ វិស័យឯកជនមកពីក្រៅប្រទេសមានការកើនឡើងជាបន្តបន្ទាប់ ដែលគិតជាតម្លៃទុនវិនិយោគមានការកើនឡើងដល់៩ពាន់៥០០លានដុល្លារហើយ ស្នើនឹង ៦២០ គម្រោងក្នុងនោះចិន និងកូរ៉េខាងត្បូងនៅតែជាប្រទេសនាំមុខគេដដែល។
នេះបើគិតរាប់ចាប់តាំងពីឆ្នាំ២០០០ រហូតមកដល់ដំណាច់ខែកញ្ញាឆ្នាំ២០២០នេះ ដែល ភី អិន អិន ទទួលបានរបាយការណ៍ពីក្រសួងរៀបចំដែនដីនគរូបនីយកម្ម និងសំណង់។
របាយការណ៍ក្រសួងរៀបចំដែនដី បានបញ្ជាក់លម្អិត ថា រយៈពេល២០ឆ្នាំមកនេះចិនបានបោះទុនវិនិយោគក្នុងវិស័យសំណង់ នៅកម្ពុជា៣៣១ គម្រោង ជាមួយនឹងទុនវិនិយោគជាង ៥ពាន់៥០០លានដុល្លារ ខណៈប្រទេសកូរ៉េខាងត្បូងមាន គម្រោងវិនិយោគ៦០គម្រោង មានទុនវិនិយោគជិត២ពាន់លានដុល្លារ ប្រទេសជប៉ុន មាន ៥៤ គម្រោង ជាមួយនឹងទុនជាង ៤រយលានដុល្លារ ថៃមាន៣៦ គម្រោងដែលមានទុនវិនិយោគ ២៥៥លានដុល្លារ និង សឹង្ហបុរីមាន ១៨គម្រោង ដែលមានទុនវិនិយ ១៨០លានដុល្លារ។
ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកកម្ម និងសំណង់បានប្រាប់ភីអិនអិននៅថ្ងៃនេះថាការវិនិយោគវិស័យសំណង់នៅកម្ពុជានៅតែដំណើរការល្អជាធម្មតាទាំងវិនិយោគក្នុងស្រុក និងបរទេស ដែលជាក់ស្តែងក្នុងរយៈពេល៩ខែដើមឆ្នាំ២០២០នេះដំណើរការនៃការស្នើសុំលិខិតអនុញ្ញាតសាងសង់គឺនៅតែឃើញមានជាបន្តបន្ទាប់ទៅលើគម្រោងវិនិយោគអគារលំនៅដ្ឋាន អគារស្នាក់នៅរូម អគារពាណិជ្ជកម្ម និងគម្រោងឧស្សាហកម្មរោងចក្រ នៅក្នុងរាជធានីភ្នំពេញ និងតាមបណ្តាខេត្តសក្តានុពលមានខេត្តកណ្តាល ខេត្តព្រះសីហនុ សៀមរាប បាត់ដំបង និងកំពតជាដើម៕
អត្ថបទ៖ ស៊ឺន សុន និងរូបភាពឯកសារ