ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
វត្តមានរបស់ ធនាគារអេស៊ីលីដា ត្រូវបានអ្នកជំនាញជាច្រើន ក៏ដូចជាថ្នាក់ដឹកនាំផ្សារមូលបត្រកម្ពុជា អះអាងថា នឹងធ្វើឲ្យទីផ្សារមូលបត្រកម្ពុជា ពិសេសទីផ្សារភាគហ៊ុន ស្ទុះកាន់តែខ្លាំងក្លាថែមទៀត។
បើតាមលោកបណ្ឌិត អ៊ិន ចាន់នី ធនាគារដ៏ធំមួយនេះ គ្រោងនឹងចុះបញ្ជីភាគហ៊ុនជាផ្លូវការ លើផ្សារមូលបត្រកម្ពុជា នៅក្នុងខែឧសភា ឆ្នាំ២០២០ នេះ។ គម្រោងនេះនឹងធ្វើឲ្យធនាគារ អេស៊ីលីដា ភីអិលស៊ី នឹងក្លាយជាធនាគារពាណិជ្ជដំបូងគេ ដែលមានការជួញដូរ ភាគហ៊ុនជាសាធារណៈនៅកម្ពុជា។
ធនាគារអេស៊ីលីដា ទើបបានសម្រេចបិទបញ្ចប់ការធ្វើបរិវិសកម្ម នៃដំណើរការបោះផ្សាយលក់ភាគហ៊ុនរបស់ខ្លួនរួចរាល់ហើយ កាលថ្ងៃទី២៤ ខែមេសាឆ្នាំ២០២០។ ជាលទ្ធផលនៃការធ្វើបរិវិសកម្មនេះ បើទោះបីជាស្ថិតនៅក្នុងស្ថានភាពនៃការរីករាលដាលនៃកូវីដ-១៩ ក៏ដោយ ក៏ធនាគារត្រូវបានបញ្ជាក់ថា នៅតែទទួលបានវិនិយោគិនក្នុងរង្វង់ប្រមាណ ២.៥០០នាក់ បានចូលរួមក្នុងដំណើរការបរិវិសកម្មនេះ។
លោក Han Kyung Tae អគ្គនាយកក្រុមហ៊ុន យាន់តា ស៊ីឃ្យួរឹធី (ខេមបូឌា) ភីអិលស៊ី បានមានប្រសាសន៍ថា ទោះបីជាស្ថិតនៅក្នុងកំឡុងពេលនៃការរីករាលដាលនៃវីរុសកូវីដ-១៩យ៉ាងណាក៏ដោយ ក៏ការធ្វើបរិវិសកម្មមូលបត្រកម្មសិទ្ធិរបស់ធនាគារ អេស៊ីលីដា ភីអិលស៊ី ទទួលបានលទ្ធផលល្អ។
តម្លៃភាគហ៊ុនចុងក្រោយ របស់ធនាគារអេស៊ីលីដា ត្រូវបានកំណត់ និងអនុម័ត ដោយគណៈកម្មការមូលបត្រកម្ពុជា គឺមានតម្លៃ ១៦.២០០រៀល ក្នុងមួយភាគហ៊ុន។ ផែនការធនាគារនេះនឹងបោះផ្សាយលក់ភាគហ៊ុនថ្មី ចំនួន ជាង ៨,៧ លានហ៊ុន ខណៈដែលភាគហ៊ុនដែលមានស្រាប់ គឺមានជាង ១៣ លានភាគហ៊ុន។
សូមបញ្ជាក់ថា បើតាមរបាយការណ៍ពីផ្សារមូលបត្រកម្ពុជា គិតមកទល់ពេលនេះ មានក្រុមហ៊ុនចុះបញ្ជីនៅលើផ្សារមូលបត្រកម្ពុជា សរុបមានចំនួន ១០ក្រុមហ៊ុន ដោយក្នុងនោះមាន ៥ លក់មូលបត្រកម្មសិទ្ធិ និងមាន ៥ក្រុមហ៊ុនទៀត លក់មូលបត្របំណុល ដោយក្រុមហ៊ុនទាំងអស់ប្រមូលទុនសរុបបាន ១៩១លានដុល្លារអាមេរិក។
អត្ថបទ៖ ចាន់ ភារម្យ