កម្លាំងនគរបាលខណ្ឌចំការមន បានអោយដឹងថា យុវជនមួយក្រុមមានគ្នាប្រហែល១០នាក់ ជិះម៉ូតូ៧-៨គ្រឿង វាយតប់គ្នា លើមហាវិថីព្រះនរោត្តម ម្ដុំស្ថានទូតថៃ ដោយសង្ស័យថា ជាក្រុមក្មេងទំនើងបង្កភាពអសន្តិសុខ អនាធិបតេយ្យ កម្លាំងនគរបាលខណ្ឌចំការមន ក៏ហៅឱ្យពួកគេឈប់ម៉ូតូដើម្បីសួរនាំ តែពួកគេមិនឈប់ បែរជាជិះម៉ូតូប្រដេញគ្នា ពេញផ្លូវរហូតចូលទៅដល់ក្នុងទីក្រុងកោះពេជ្រ សមត្ថកិច្ចក៏ឃាត់ខ្លួនបាន ៥នាក់ ចំណែក ៤នាក់ទៀតបានរត់គេចខ្លួនផុតពីសំណាញ់សន្តិសុខ។

ករណីនេះ បង្កឲ្យមានការភ្ញាក់ផ្អើលកាលពីវេលាម៉ោង៩យប់ ថ្ងៃទី២១ ខែកញ្ញាឆ្នាំ២០២០ ចាប់តាំងពីនៅម្ដុំស្ថានទូតថៃរហូតដល់ក្នុងបរិវេនមជ្ឈមណ្ឌលកោះពេជ្រ ដែលស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ , សមត្ថកិច្ចដកហូតម៉ូតូបាន ៤គ្រឿង។ 

បច្ចុប្បន្នយុវជនប្រុស-ស្រីទាំង៥នាក់ កំពុងស្ថិតក្នុងការសាកសួរសាវតារនៅប៉ុស្តិ៍នគរបាលរដ្ឋបាលទន្លេបាសាក់ ខណ្ឌចំការមន ៕

អត្ថបទ និងរូបភាព ៖ ទុយ ម៉ែន