ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
ប្រជាពលរដ្ឋ អ៊ីស្រាអែល រាប់ពាន់នាក់បានធ្វើការតវ៉ាប្រឆាំងនាយករដ្ឋមន្ត្រី អ៊ីស្រាអែល លោក បេនចាមីន នេតាន់យ៉ាហ៊ូ នៅក្នុងទីក្រុង ហ្សេរុយសាឡឹម កាលពីថ្ងៃអាទិត្យ។ ការតវ៉ានេះបានកើតឡើងបន្ទាប់ពីវិធានការបិទទ្វារទូទាំងប្រទេសជាលើកទី២ ដើម្បីទប់ទល់នឹងការរាលដាលជំងឺខូវីដ ១៩ ដែលនឹងមានរយៈពេលយ៉ាងតិច ៣ សប្ដាហ៍ ដោយតម្រូវឲ្យពលរដ្ឋ អ៊ីស្រាអែល ធ្វើដំណើរចេញពីផ្ទះចម្ងាយតែ ១០០០ ម៉ែត្រ ប៉ុន្តែក៏មានករណីលើកលែងខ្លះទៀតដែរ។
ប្រជាពលរដ្ឋ អ៊ីស្រាអែល ជាច្រើនបានចោទលោក នេតាន់យ៉ាហ៊ូ និងមន្ត្រីពាក់ព័ន្ធរបស់លោកថា មិនបានដោះស្រាយជំងឺឆ្លងនេះឲ្យបានទូលំទូលាយ និងមានភាពយឺតយ៉ាវក្នុងការឆ្លើយតបចំពោះការកើនឡើងថ្មីនៃករណីឆ្លងជំងឺនេះ។ ហ្វូងអ្នកតវ៉ាបានប្រមូលផ្ដុំគ្នានៅខាងក្រៅផ្ទះរបស់លោក នេតាន់យ៉ាហ៊ូ ដោយអ្នកខ្លះផ្លុំកញ្ចែ អ្នកខ្លះទៀតគ្រវីទង់ជាតិនិងបដាផ្សេងៗដោយអំពាវនាវឲ្យនាយករដ្ឋមន្ត្រីចុះចេញពីតំណែង ខណៈដែលអ្នកខ្លះទៀតបានជួបជុំគ្នានៅលើស្ពាន និងផ្លូវរង្វង់មូលនៅតាមទីក្រុងនៅទូទាំងប្រទេស អ៊ីស្រាអែល។
ប្រទេស អ៊ីស្រាអែល បានរាយការណ៍ពីករណីឆ្លងជំងឺខូវីដ ១៩ សរុបចំនួនជិត ១៨៧ ៣៩៦ នាក់ ក្នុងនោះស្លាប់ចំនួនជាង ១ ២៣៦ នាក់នៅក្នុងចំណោមប្រជាជនសរុបចំនួន ៩ លាននាក់ ដែលធ្វើឲ្យសេដ្ឋកិច្ចប្រទេសនេះធ្លាក់ចុះនិងធ្វើឲ្យអត្រាគ្មានការងារធ្វើកើនឡើងជាង ២០ ភាគ៕
ប្រែសម្រួល៖ SN