សន្តិសុខត្រូវបានបង្កើននៅក្រៅសេតវិមានក្រោយពីមានការបាញ់ប្រហារ

កងកម្លាំងប៉ូលិសនៅទីក្រុងវ៉ាស៊ីងតោនឌីស៊ី និងភ្នាក់ងារចារកម្មអាមេរិកបានបង្កើនសន្តិសុខយ៉ាងខ្លាំងនៅជុំវិញសេតវិមានកាលពីថ្ងៃចន្ទក្រោយពីការបាញ់ប្រហារមួយបានកើតឡើងដែលបានរំខានដល់ការធ្វើសន្និសីទកាសែតរបស់លោក ដូណាល់ ត្រាំ ប្រធានាធិបតីសហរដ្ឋអាមេរិក។

ភ្នាក់ងារសម្ងាត់សហរដ្ឋអាមេរិក (USSS) បានអមការពារសុវត្ថិភាពលោក ត្រាំ ចេញពីបន្ទប់ធ្វើសនិ្នសីតកាសែតនៅសេតវិមានភ្លាមៗនៅក្នុងអំឡុងពេលធ្វើសន្និសីទកាសែតកាលពីថ្ងៃចន្ទដោយសារមានការបាញ់ប្រហារមួយនៅខាងក្រៅសេតវិមាន។

ប៉ុន្តែនៅរយៈពេលប៉ុន្មាននាទីក្រោយមក លោក ត្រាំ បានវិលត្រឡប់ទៅកាន់បន្ទប់សារព័ត៌មានវិញដោយបាននិយាយថា មនុស្សម្នាក់ត្រូវបានបាញ់ប្រហារដោយអនុវត្តតាមច្បាប់ និងបានបញ្ជូនទៅមន្ទីរពេទ្យ ហើយលោកបានបន្តទៀតថា ជនសង្ស័យគឺមានអាវុធនៅក្នុងដៃ។

លោក ត្រាំ បានបន្ថែមទៀតថា ការបាញ់ប្រហារនេះបានកើតឡើងនៅជិតរបងជាប់នឹងបរិវេណសេតវិមានតែម្ដង។
ភ្នាក់ងារចារកម្មនេះបាននិយាយថា ពេលនេះគេកំពុងធ្វើការសង្កេតចំពោះមន្ត្រីចារកម្មអាមេរិកម្នាក់ដែលអាចពាក់ព័ន្ធនឹងការបាញ់ប្រហារនេះខណៈដែលបុរសម្នាក់និងមន្ត្រីភ្នាក់ងារចារកម្មម្នាក់ត្រូវបានបញ្ជូនទៅមន្ទីរពេទ្យមូលដ្ឋានមួយកន្លែង។
លោក ត្រាំ បានបញ្ជាក់ថា គ្មានអ្នកណាផ្សេងទៀតបានរងរបួសនៅក្នុងការបាញ់ប្រហារនេះទៀតទេ ហើយលោកក៏បានសរសើរចំពោះចំណាត់ការឆ្លើយតបរបស់ភ្នាក់ងារសម្ងាត់អាមេរិកនេះផងដែរ៕