ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ពាក់ព័ន្ធនឹងជំងឺខូវីដ១៩ គិតត្រឹមល្ងាចថ្ងៃច័ន្ទ ចំនួនអ្នកឆ្លងសរុបនៅទូទាំងពិភពលោក កើនដល់ជាង២០លាននាក់ (20,026,161), ចំណែកអ្នកស្លាប់កើនដល់ជាង៧សែន ៣ម៉ឺននាក់ (734,020)។ មានដំណឹងដ៏គួរឲ្យភ្ញាក់ផ្អើលមួយបន្ទាប់ពី
រដ្ឋាភិបាលរុស្ស៊ីថ្លែងដោយមោទនភាពថាខ្លួននឹងក្លាយជាប្រទេសដែលផលិតវ៉ាក់សាំងជំងឺខូវីដ១៩ បានសម្រេចមុនគេនៅលើពិភពលោក។ ជាក់ស្ដែង រុស្ស៊ីអះអាងថាខ្លួនអាចផលិតបានវ៉ាក់សាំងក្នុងទ្រង់ទ្រាយធំត្រឹមដើមខែតុលាខាងមុខនេះ។
បើគេពិនិត្យមើលស្ថានការណ៍នៅទ្វីបអាស៊ីមុនគេ។ ក្រសួងសុខាភិបាលថៃមិនបានរកឃើញអ្នកឆ្លងជំងឺខូវីដ១៩ថ្មីទេ នៅក្នុងរយៈពេល២៤ម៉ោងកន្លងទៅនេះ។ ចំណែកនៅវៀតណាម ក្រសួងសុខាភិបាលរកឃើញអ្នកឆ្លងថ្មី៣១នាក់ និងស្លាប់២នាក់ ដែលធ្វើឲ្យអ្នកឆ្លងសរុបកើនដល់៨៤១នាក់ និងស្លាប់១៣នាក់។ នៅក្នុងកិច្ចប្រជុំកាលពីពេលថ្មីៗនេះ, វៀតណាមបាននិយាយក្រើនរំឭកឲ្យប្រុងប្រយ័ត្នជាបន្តទៀត។ ជាពិសេស គេត្រូវបង្កើនការតាមដានជនសង្ស័យ ដោយបច្ចេកវិទ្យាទំនើប។
នៅប្រទេសចិន ក្រសួងសុខាភិបាលរកឃើញអ្នកឆ្លងថ្មី៤៩នាក់ និងស្លាប់២នាក់។ ក្នុងនោះ ៣៥នាក់ជាករណីនាំចូល។ ចំពោះករណីឆ្លងនៅក្នុងសហគមន៍សុទ្ធតែកើតមាននៅខេត្តស៊ីនជាំង។ សព្វថ្ងៃនេះ ប្រទេសចិននៅសល់អ្នកជំងឺ៨០២នាក់។
នៅហ្វ៊ីលីពីន, រដ្ឋាភិបាលត្រៀមបើកយុទ្ធនាការចែកម៉ាស់១លានបន្ទះ នៅទីក្រុងម៉ានីឡា ដើម្បីកាត់បន្ថយជំងឺខូវីដ១៩។ ប្រទេសនេះនៅតែបន្តគ្រប់គ្រងតំណែងលេខមួយនៅអាស៊ីអាគ្នេយ៍ខាងចំនួនអ្នកឆ្លង ដែលមានប្រមាណ១សែន ៣ម៉ឺននាក់។
នៅកូរ៉េខាងត្បូង, ក្រសួងសុខាភិបាលរកឃើញអ្នកឆ្លងថ្មី២៨នាក់។ ក្នុងនោះ ១១នាក់រស់នៅទីក្រុងសេអ៊ូល។ គេសង្កេតឃើញថាអត្រាជាសះស្បើយឡើងវិញ នៅក្នុងចំណោមអ្នកជំងឺខូវីដ១៩ មានកម្រិតខ្ពស់ រហូតដល់ទៅ៩៣%ឯណោះ។
នៅអូស្ត្រាលី, អាជ្ញាធររកឃើញអ្នកឆ្លង៣២២នាក់ និងស្លាប់១៩នាក់នៅរដ្ឋវីកថូរៀ។ នេះជាអត្រាមរណភាពប្រចាំថ្ងៃដែលខ្ពស់បំផុត។ នាយករដ្ឋមន្ត្រីអូស្ត្រាលីប្រកាសបិទរដ្ឋ និងសហគមន៍នានាជាបន្តទៀត រហូតដល់ថ្ងៃបុណ្យគ្រីសស្មាស់។
បើគេងាកមកតាមដានស្ថានការណ៍នៅទ្វីបអាមេរិកវិញម្ដង។ ចំនួនអ្នកឆ្លងខូវីដ១៩នៅសហរដ្ឋអាមេរិកកើនដល់ជាង៥លាន ១សែននាក់ (5,199,444), ចំណែកអ្នកស្លាប់កើនដល់ជាង១សែន ៦ម៉ឺននាក់ (165,617)។ ប្រទេសដទៃទៀតដូចជា៖ ប្រេស៊ីល ម៉ិកស៊ីកូ និងវេណេហ្ស៊ូអេឡា នៅតែមានអត្រាឆ្លងប្រចាំថ្ងៃខ្ពស់ជានិច្ច។ ប្រធានាធិបតីម៉ាឌូរ៉ូប្រកាសដាក់ប្រទេសនៅក្នុងគ្រាប្រុងប្រយ័ត្នរយៈពេល៣០ថ្ងៃ បន្ទាប់ពីអត្រាឆ្លងពីប្រទេសដទៃចូលក្នុងប្រទេសវេណេហ្ស៊ូអេឡាហក់ឡើងខ្ពស់៕
ប្រែសម្រួល៖ អន សំអាង