ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
បន្ទាប់ពីមានហែបាតុកម្មជាបន្តបន្ទាប់នៅប្រទេសថៃ ដែលដឹកនាំដោយក្រុមសកម្មជន និងយុវជនវ័យក្មេងដើម្បីទាមទារឲ្យរដ្ឋាភិបាលចុះចេញពីតំណែងកាលពីពេលថ្មីៗនេះ, ក៏មានអ្នកគាំទ្ររដ្ឋាភិបាលបានចេញមុខហែបាតុកម្មផងដែរ។ ពួកគេបានទាមទារឲ្យរដ្ឋាភិបាលចាត់វិធានការទប់ស្កាត់ចលនានិស្សិតខាងលើនេះ ដើម្បីថែរក្សាតម្លៃរបស់យុវជនជាទូទៅ។
នៅក្នុងចំណោមអ្នកហែបាតុកម្មគាំទ្ររដ្ឋាភិបាលទាំងនោះ អ្នកខ្លះថ្លែងថាពួកគេជាអ្នកតំណាងឲ្យសិស្ស និស្សិត និងនិស្សិតជាន់ចាស់ ដែលប្ដេជ្ញាគាំទ្រចំពោះរដ្ឋធម្មនុញ្ញនាពេលបច្ចុប្បន្ននេះ។ ពួកគេមិនអាចឈរឱបដៃមើល និងរក្សាភាពស្ងៀមស្ងាតតទៅទៀតទេ ចំពោះទង្វើរបស់ក្រុមអ្នកប្រឆាំងនឹងរដ្ឋាភិបាល ដែលតាំងខ្លួនជាយុវជនជំនាន់ក្រោយ។
អ្នកខ្លះទៀតយល់ថានេះជាពេលវេលា ដែលពួកគេត្រូវនិយាយក្រើនរំឭកយុវជន ក៏ដូចជាឪពុកម្ដាយ អាណាព្យាបាល និងមន្ត្រីរដ្ឋាភិបាលគ្រប់លំដាប់ថ្នាក់ ដើម្បីឲ្យពួកគេយល់ច្បាស់អំពីគ្រោះថ្នាក់ដោយសារទង្វើរបស់ចលនានិស្សិត ដែលតែងតែហែបាតុកម្មញុះញង់ឲ្យយុវជនលែងជឿបុណ្យបាប លែងថែរក្សាវប្បធម៌ប្រពៃណីជាតិ, ហើយបែរជាឈ្លក់វង្វេងនឹងវប្បធម៌បរទេស និង គ្រឿងញៀន។ គំនិតទាំងនេះអាចឲ្យពួកគេបែកឆ្វេងកាន់តែខ្លាំង លែងគោរពឪពុកម្ដាយ ចាស់ទុំ និងគ្រូបង្រៀនរបស់ពួកគេ៕
.jpg)
ប្រែសម្រួល៖ អន សំអាង
