ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
ចំនួនអ្នកស្លាប់ដោយសារការរអិលបាក់ដីនៅចម្ការដើមតែមួយកន្លែងនៅរដ្ឋកេរ៉ាឡានៅភាគខាងត្បូងប្រទេសឥណ្ឌាបានឡើងដល់ ៤៣ នាក់ហើយកាលពីថ្ងៃអាទិត្យខណៈដែលមនុស្សចំនួន ២៤ នាក់ទៀតអាចកំពុងជាប់នៅក្រោមដី។
មូលដ្ឋានបាននិយាយថា គ្រោះថ្នាក់រអិលបាក់ដីបណ្ដាលមកពីការធ្លាក់ភ្លៀងខ្លាំងបានកើតឡើងនៅចម្ការដើមតែដែលស្ថិតនៅក្នុងស្រុកអ៊ីឌូគីនៅរដ្ឋកេរ៉ាឡាកាលពីព្រឹកថ្ងៃសុក្រនៅពេលកម្មករនៅកំពុងលង់លក់ក្នុងដំណេកនៅឡើយនោះ។
តាំងពីគ្រោះថ្នាក់នោះបានកើតឡើង ក្រុមអ្នកជួយសង្គ្រោះបានបន្តប្រតិបត្តិការរបស់ខ្លួនរហូតដល់ពេញមួយថ្ងៃអាទិត្យម្សិលមិញនេះខណៈដែលមន្ត្រីជាន់ខ្ពស់ម្នាក់បានបញ្ជាក់ប្រាប់ទីភ្នាក់ងាររ៉យទ័រថា រហូតមកដល់ពេលនេះ គេបានរកឃើញសាកសពចំនួន ៤៣ នាក់ហើយ។
អនុរដ្ឋមន្ត្រីការបរទេសឥណ្ឌាលោក វី មូរ៉ាលីដហារ៉ាន បានចុះទៅពិនិត្យមើលកន្លែងកើតហេតុកាលពីថ្ងៃម្សិលមិញ ខណៈដែលក្រុមអ្នកជួយសង្គ្រោះបានបន្តស្វែងរកអ្នកដែលអាចរួចផុតពីគ្រោះថ្នាក់នេះជាបន្តទៀត។
នាយកដ្ឋានឧតុនិយមប្រទេសឥណ្ឌាបានចេញសញ្ញាប្រកាសអាសន្នចំពោះការធ្លាក់ភ្លៀងខ្លាំងនៅក្នុងស្រុកមួយចំនួនរួមទាំងស្រុកអ៊ីឌូគីនេះផងដែរ ហើយគួររំលឹកដែរថា កាលពីឆ្នាំ២០១៨ រដ្ឋកេរ៉ាឡាបានរងគ្រោះដោយជំនន់ទឹកភ្លៀងខ្លាំងបំផុតក្នុងរយៈពេល ១ សតវត្សរ៍ដោយបានសម្លាប់មនុស្សរាប់រយនាក់ដែលក្នុងនោះភាគច្រើនគឺប្រជាពលរដ្ឋនៅស្រុក អ៊ីឌូគី នេះតែម្ដង៕
ប្រែសម្រួល៖SN