ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
មនុស្ស១៧នាក់ស្លាប់ និងរាប់សិបនាក់រងរបួស បន្ទាប់ពីយន្តហោះរបស់ក្រុមហ៊ុនអាកាសចរណ៍អ៊ែរ.អ៊ីនឌា.អ៊ិចស្ប្រែស (Air India Express)១គ្រឿងរត់ខុសផ្លូវ និងដាច់ជា២កំណាត់។ សាក្សីនិយាយថានៅពេលចុះចត មានភ្លៀងធ្លាក់មួយមេធំ ដែលអាចជាមូលហេតុធ្វើឲ្យផ្លូវមានភាពរអិល គួបផ្សំនឹងពីឡុតមើលផ្លូវមិនសូវឃើញច្បាស់។ យន្តហោះម៉ាកបូអ៊ីង៧៣៧មួយគ្រឿងនោះ មុនពេលកើតហេតុ បានចេញដំណើរពីទីក្រុងឌុយបៃ នៃប្រទេសអារ៉ាប់រួម ដោយពាំនាំនូវជនជាតិឥណ្ឌាជាច្រើននាក់ ដែលខកដំណើរនៅប្រទេសដទៃដោយសារការរំខាននៃជំងឺខូវីដ១៩។
អ្នកជិះនៅលើនោះមានគ្នាសរុប១៩០នាក់ រួមមានអ្នកដំណើរ និងបុគ្គលិករបស់ក្រុមហ៊ុនអាកាសចរណ៍។ នៅលើកញ្ចក់ទូរទស្សន៍ក្នុងស្រុក, គេឃើញក្រុមអ្នកជួយសង្គ្រោះបានខិតខំជីកកកាយគំនរបាក់បែកចេញទាំងកណ្ដាលភ្លៀងធ្លាក់ ដើម្បីស្វែងរកអ្នកដែលអាចនៅរស់រានមានជីវិត។ អាជ្ញាធរនិយាយថាយន្តហោះបានដាច់ជាពីរកំណាត់ ចំណែកម៉ាស៊ីនយន្តហោះរហែកដាច់ពីគ្នា បន្ទាប់ពីយន្តហោះរអិលខុសផ្លូវ និងធ្លាក់ចូលទៅក្នុងជង្ហុកជម្រៅ៩ម៉ែត្រ។ ប្រភពខ្លះទៀតថាយន្តហោះរត់ហួសខុសផ្លូវ, រួចដាំក្បាលទៅបុកនឹងដី៕
ប្រែសម្រួល៖អន សំអាង