ថ្ងៃសុក្រ ទី១៩ ខែមេសា ឆ្នាំ២០២៤
ថ្ងៃសុក្រ ទី១៩ ខែមេសា ឆ្នាំ២០២៤
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា NOCC បានឲ្យដឹងកាលពីពេលថ្មីៗនេះថា គិតមកទល់ចុងខែមេសា ឆ្នាំ២០២០នេះ សំណង់កីឡដ្ឋានធំនៃពហុកីឡដ្ឋានជាតិមរតកតេជោ ដែលអាចផ្ទុកអ្នកទស្សនាបានដល់ទៅ៦ម៉ឺននាក់នោះ ដំណើរការសាងសង់បានប្រមាណ៧០ទៅ៨០ភាគរយហើយ។ ឯកឧត្ដមបញ្ជាក់ថា ពហុកីឡដ្ឋាននេះ សង់រួចរាល់ទាំងស្រុងផ្នែកសំណង់រឹង ដោយនៅសល់តែការបំពាក់ដំបូល និងគ្រឿងបរិក្ខាសង្ហារឹមចំនួនធំតែប៉ុណ្ណោះ។
«ទោះក្នុងវិបត្តិកូវីដក្ដី ប៉ុន្តែការសាងសង់ពុំមានផ្អាកផ្នែកណាមួយទេ ព្រោះមានកម្មករទាំងខ្មែរ និងចិនជាង៤០០នាក់ ដោយមិនមានអ្នកចេញមកខាងក្រៅការដ្ឋាន ឬអ្នកផ្សេងចូលទៅនោះទេ។ ហេតុនេះដំណើរការសាងសង់បានប្រព្រឹត្តទៅដោយរលូន ហើយយើងអាចវាយតម្លៃបានថា រួចរាល់នៅចន្លោះពី៧០ទៅ៨០ហើយសម្រាប់កីឡដ្ឋានធំ ដែលយើងត្រៀមរៀបចំបើក និងបិទស៊ីហ្គេមនៅទីនោះ»។ ឯកឧត្ដម វ៉ាត់ ចំរើន ពន្យល់បែបនេះ។
អគ្គលេខាធិការ NOCC ដដែលបានសង្កត់ធ្ងន់ទៀតថា យ៉ាងណាក៏ដោយ ពហុកីឡដ្ឋានធំនេះ នឹងធ្វើរួចរាល់ជាស្ថាពរនៅចុងឆ្នាំ ២០២០ឱ្យខាងតែបាន ដើម្បីត្រៀមប្រើប្រាស់នៅដើមឆ្នាំ ២០២១។
គួរបញ្ជាក់ថា កីឡដ្ឋានធំនៃពហុកីឡដ្ឋានជាតិមរតកតេជោ ត្រូវបានសាងសង់ឡើងដោយចំណាយថវិកាចំនួន១៦០លានដុល្លារអាមេរិក លើផ្ទៃដី១៦.២២ហិកតា ស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។ កីឡដ្ឋានធំដ៏ស្រស់ស្អាត ដែលអាចផ្ទុកអ្នកទស្សនាបាន ៦ម៉ឺននាក់នេះ នឹងត្រៀមសម្រាប់ការរៀបចំពិធីបើក និងពិធីបិទ ព្រឹត្តិការណ៍កីឡាស៊ីហ្គេមលើកទី៣២ នាឆ្នាំ២០២៣ ដែលកម្ពុជាធ្វើជាម្ចាស់ផ្ទះ៕
អត្ថបទ និងរូបភាព៖ ងិន មករា
