ថ្ងៃអង្គារ៍ ទី២៣ ខែមេសា ឆ្នាំ២០២៤
ថ្ងៃអង្គារ៍ ទី២៣ ខែមេសា ឆ្នាំ២០២៤
ក្រោយសម្រាកមួយរយៈខ្លី អំឡុងពេលការរីករាលដាលនៃជំងឺ Covid-19 និងឆ្លើយតបចំពោះការទន្ទឹងរង់ចាំយ៉ាងខ្លាំង ពីសំណាក់អ្នកគាំទ្រ និងទស្សនិកជនកម្មវិធីប្រដាល់ «អធិរាជគុនខ្មែរ ISI PALM- ISI PIPE» នៅភីអិនអិន នឹងត្រលប់បើកការប្រកួតឡើងវិញ នាថ្ងៃទី០៣ ខែឧសភា តែពុំទាន់អនុញ្ញាតិឲ្យមានទស្សនិកជនផ្ទាល់ទេ។
ការវិលវិញនៃកម្មវិធីប្រដាល់គុនខ្មែរ ទទួលបានការឧបត្ថម្ភផ្ដាច់មុខពីក្រុមហ៊ុន ISI STEEL នៅថ្ងៃអាទិត្យចុងសប្ដាហ៍នេះ នឹងនាំមកនូវ ការប្រកួតមិត្តភាពដ៏ពិសេស និងកក្រើកពុំធ្លាប់មាន ប្រជុំដោយជើងខ្លាំងចំនួន៥គូ ហើយប្រកួតគ្នា៣ទឹកក្នុងមួយប្រកួត។
គូសំខាន់ៗគួរជក់ចិត្តក្នុងថ្ងៃអាទិត្យ ទី០៣ ខែឧសភាខាងមុខនេះរួមមាន ម្ចាស់ខ្សែក្រវាត់ប្រាក់ អធិរាជគុនខ្មែរ ISI PALM-ISI PIPE រដូវកាលទី១ ឡុង ជិន ប៉ះរលកថ្មី ទូច ដេវីដ ស្របពេលខ្លាកំណាចខេត្តឧត្ដរមានជ័យ ចាន់ សំអាត តតាំងជើងខ្លាំងមកពីក្លិបប្រដាល់សមាគមកីឡាប្រដាល់ក្រសួងការពារជាតិ ព្រឿង សុជាតិ។
លើសង្វៀនតែមួយ គូពិសេសបីគូទៀត ថ្នាលគុនខ្មែរកំពុងលេចធ្លោ យីប ឌុក ត្រៀមប្រឈមមុខនឹង ជ័យ គឹមហុង ខណៈអ្នកប្រយុទ្ធវ័យក្មេង ម៉ន រិទ្ធី បើកឆាកស្វាគមន៍ ផាន ផាន់ណាត់ រួមទាំងជើងខ្លាំងទម្ងន់ស្រាល សួរ កក្កដា តទល់ ឡុង សុខលីម។
កម្មវិធី «អធិរាជគុនខ្មែរ ISI PALM- ISI PIPE» នាថ្ងៃអាទិត្យ ទី០៣ ខែឧសភា សប្ដាហ៍នេះ នឹងធ្វើការផ្សាយផ្ទាល់ចាប់ពីម៉ោង១២ថ្ងៃត្រង់តទៅ លើកញ្ចក់ទូរទស្សន៍ PNN ផេកហ្វេសប៊ុក PNN Sports និងផេកហ្វេសប៊ុក ISI STEEL៕
អត្ថបទ និង រូបភាព៖ នូ ពៅ