ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
បរិយាកាសធ្វើជំនួញរបស់កម្ពុជា ក្នុងឆ្នាំនេះ មានការធ្លាក់ចុះបន្តិចមកត្រឹម ៤៨,៨ ខណៈដែលកាលពីឆ្នាំមុនកម្ពុជា ទទួលបាន៥០,៤។ នេះបើយោងតាមការរបាយការណ៍ស្ទង់មតិ Business Confidence index របស់សភាពាណិជ្ជកម្មសហភាពអឹរ៉ុបប្រចាំប្រទេសកម្ពុជា ដែលហៅកាត់ថា Eurocham ដែលបានចេញផ្សាយកាលពីព្រឹកមិញនេះ។
ការស្ទង់មតិនោះ ក៏បានបង្ហាញថា បើទោះបីជាវាយតម្លៃជារួម កម្ពុជា ទទួលបានពិន្ទុទាបជាងឆ្នាំមុន បន្តិចក្តី ក៏កម្ពុជាមានភាពល្អប្រសើរ បន្តិចនៃការប្រកួតប្រជែង ក្នុងតំបន់ដោយសារតែតម្លៃពលកម្មនៃធនធានមនុស្សទាប ភាពល្អប្រសើរឡើងបន្តិចនៃហេដ្ឋារចនាសម្ព័ន្ធ និងអគ្គីសនី ប៉ុន្តែរបាយការណ៍ក៏បានបង្ហាញថា ការប្រែប្រួលបទបញ្ញត្តិលើផ្នែកពន្ធដារ នាពេលថ្មីៗនេះ បានក្លាយជាឧបសគ្គនៃការធ្វើធុរៈកិច្ច។
របាយការណ៍មួយនេះបានបញ្ជាក់ថា អ្នកបានឆ្លើយតប ក្នុងការស្ទាបស្ទង់មតិនេះ បញ្ជាក់ថា ហាក់ដូចជាមានការប្រុងប្រយ័ត្ន ចំពោះការឈានចូលមកដល់នៃការបោះឆ្នោត ក្នុងឆ្នាំ២០១៨នាពេលខាងមុខ។ ប៉ុន្តែរបាយការណ៍ ក៏បានអះអាងថា សកម្មភាពធុរកិច្ច នៅមានភាពសុទិដ្ឋិនិយមច្រើន និងភាគច្រើន ក៏មានគម្រោងពង្រីកសកម្មភាពមុខជំនួញរបស់ខ្លួននៅកម្ពុជា។
លោក Arnaud Darc (អាលណល់ ដាក) ប្រធានសភាពាណិជ្ជកម្មសហភាពអឺរ៉ុបប្រចាំនៅកម្ពុជាបានអះអាងថាសម្រាប់លោកមានទំនុកចិត្តចំពោះស្ថេរភាពរបស់កម្ពុជា លោកមានទំនុកចិត្តលើការផ្លាស់ប្តូរដែលអាចគ្រប់គ្រងបានដែលនឹងជម្រុញអោយកម្ពុជាមានការអភិវឌ្ឍន៍កាន់តែលឿន។
Business Confidence index របស់EuroCham Cambodia បានធ្វើការស្ទង់មតិសមាជិករបស់ខ្លួន និងបានទទួលការឆ្លើយតបចំនួន១១៥ដែលមកពី២០ផ្នែកផ្សេងគ្នា។ របាយការណ៍នេះបានធ្វើការស្ទង់មតិសមាជិករបស់ខ្លួនក្នុងចន្លោះពីខែមីនាដល់ខែឧសភាក្នុងឆ្នាំនេះ។
លោកឧកញ៉ា សុខ ពិសិដ្ឋ ប្រធានសមាគមន៍សហគ្រិនវ័យក្មេងកម្ពុជា បានបញ្ជាក់ថា របាយការណ៍របស់ EuroCham Cambodia នេះគឺធាតុចូលមួយយ៉ាងសំខាន់ ក្នុងការពង្រឹងបរិយាកាសធ្វើជំនួញនៅកម្ពុជាអោយកាន់តែល្អប្រសើរឡើង។ លោកឧកញ៉ា បានបញ្ជាក់ថា កម្ពុជាមានច្បាប់ និងមានគោលនយោបាយមួយចំនួន ក្នុងការទាក់ទាញវិនិយោគិនអោយមកវិនិយោគនៅកម្ពុជា ក៏ដូចជាការកែទម្រង់របស់ស្ថាប័នមួយចំនួន ងាកមកប្រើប្រាស់ប្រព័ន្ធOnlineដើម្បីជម្រុញប្រសិទ្ធការងារ។
ក្នុងរបាយការណ៍ដដែល Business Confidence indexនេះក៏បានប្រមើរមើលថាប្រមាណ៧៥%នៃការឆ្លើយតបក្នុងការស្ទង់មតិនេះ រំពឹងថាមុខជំនួញរបស់ខ្លួននៅតែបន្តកំនើនទៅមុខ។ ចំនែកឯ គម្រោងក្នុងការពង្រីកសកម្មភាពមុខជំនួញរបស់ពួកគេ ក៏របាយការណ៍អះអាងថាមានចំនួនប្រមាណ៦០% បើទោះបីជាការមានការកើនឡើងនៃភាពមិនច្បាស់លាស់នាពេលអនាគតក្តី ខណៈអ្នកឆ្លើយតបប្រមាណ២២% អះអាងពីភាពមិនច្បាស់លាស់ក្នុងការពង្រឹកសកម្មភាពមុខជំនួញ៕
សូមទស្សនាព័ត៌មានជាវីដេអូ៖
ប្រភព៖ PNN News