ថ្ងៃសុក្រ ទី២៩ ខែមីនា ឆ្នាំ២០២៤

អ៊ុំ សុវណ្ណគិរី លើសពីអាក្រក់ក្នុងរឿង”អ្នកម៉ាក់វ័យក្មេង” វគ្គ២

៣០ កក្កដា ២០២០ | កម្សាន្ដ

ក្មួយប្រុសតារាសម្តែងស្រីល្បីល្បាញ អ៊ុំ សុវណ្ណនី គឺលោក អ៊ុំ សុវណ្ណគិរី កាន់តែអាក្រក់ខ្លាំងជាងមុនទៅទៀតក្នុងរឿង «អ្នកម៉ាក់វ័យក្មេង» វគ្គ២ ដែលកំពុងដំណើរការថតយ៉ាងសស្រាក់សស្រាំ។

 

លោក អ៊ុំ សុវណ្ណគិរី តួអង្គអាក្រក់ក្នុងភាពយន្តភាគ «អ្នកម៉ាក់វ័យក្មេង» វគ្គ១ នៅតែបន្តបង្ហាញវត្តមានក្នុងវគ្គ២ទៀត ក្រោយភាពយន្តភាគនេះផ្ទុះការគាំទ្រខ្លាំងពីទស្សនិកជន។

 


តាមការឲ្យដឹងពីសាម៉ីខ្លួន ក្នុងរឿង «អ្នកម៉ាក់វ័យក្មេង» វគ្គ២ លោកនៅតែសម្តែងជាតួអង្គមនុស្សអាក្រក់ដដែល ហើយកាន់តែអាក្រក់ជាងវគ្គ១ទៅទៀត គ្រាន់តែវគ្គ១មានលាយឡំឈុតឆាកកម្សត់ខ្លះខុសពីវគ្គ២ដែលលោកនឹងក្លាយជាមនុស្សអាក្រក់សុទ្ធសាធ។ 


យ៉ាងណាមិញលោកបានបង្ហើបថា ក្នុងវគ្គ២នេះ ក៏មានចំណុចខុសពីវគ្គ១ច្រើនដែរសម្រាប់តួអង្គរបស់ខ្លួន តែប្រែប្រួលបែបណានោះលោកសុំមិនបញ្ជាក់ គឺទុកពញ្ញាក់អារម្មណ៍អ្នកទស្សនា ឲ្យទស្សនានឹងភ្នែកហួសចិត្តតែម្ដង។

 


កម្លោះសង្ហា សុវណ្ណគិរី កាន់តែមានប្រជាប្រិយភាពខ្លាំងឡើងៗនាប៉ុន្មានឆ្នាំចុងក្រោយនេះ បន្ទាប់ពីលោកទទួលឱកាសថតភាពយន្តជាហូរហែរពីផលិតករក្នុងស្រុក។
គួររំលឹកថា ក្មូយប្រុសអតីតតារាសម្តែងល្បីឈ្មោះ អ៊ុំ សុវណ្ណនី រូបនេះត្រូវបានគេចាប់ផ្តើមស្គាល់ តាមរយៈស្នាដៃថតភាពយន្តមួយចំនួន ដូចជារឿង «ក្រមុំបេះដូងដែក ប៉ះអង្គរក្សចិត្តខ្លាំង» រឿង «កូនប្រសាឡឺកឺ» រឿង «គ្រាប់បាល់អង្រួនបេះដូង» ហើយចុងក្រោយនេះលោកក្រសោបបានប្រជាប្រិយភាពកាន់តែខ្លាំងបន្ទាប់ពីសម្តែងក្នុងរឿង «អ្នកម៉ាក់វ័យក្មេង» កាលពីវគ្គ១។

 


ក្រៅពីថតភាពយន្ត លោកក៏ត្រូវបានគេចាប់អារម្មណ៍ខ្លាំង តាមរយៈការសម្តែង ឈុតផ្សព្វផ្សាយពាណិជ្ជកម្ម និងក្នុងMV បទចម្រៀងជាច្រើនទៀតថែមទៀតផង។

អត្ថបទ៖ រ៉ាត់ ចាន់ធីតា  

ព័ត៌មានដែលទាក់ទង

© រក្សា​សិទ្ធិ​គ្រប់​យ៉ាង​ដោយ​ PNN ប៉ុស្ថិ៍លេខ៥៦ ឆ្នាំ 2024