ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាក់លិខិត នៅថ្ងៃទី២៩ ខែសីហា ជូនប្រធានតុលាការកំពូល ដើម្បីប្តឹងរំលាយគណបក្សនយោបាយចំនួន៩។ គណបក្សនយោបាយទាំង ៩នោះ ត្រូវបានរដ្ឋមន្ត្រីក្រសួងមហាផ្ទៃ លើកឡើងថា បានប្រព្រឹត្តល្មើសនឹងច្បាប់ ស្តីពីគណបក្សនយោបាយ ដោយមិនបានផ្ញើរបាយការណ៍ប្រចាំឆ្នាំ ជូនមកក្រសួងមហាផ្ទៃ ជាបន្តបន្ទាប់។
នៅក្នុងលិខិត សម្តេចក្រឡាហោម ស ខេង បានជម្រាបជូនប្រធានតុលាការកំពូលថា គណបក្សនយោបាយចំនួន៩ ដែលបានចុះបញ្ជីនៅក្រសួងមហាផ្ទៃ រួមមាន គណបក្សប្រជាជាតិខ្មែរ គណបក្សពលរដ្ឋខ្មែរ គណបក្សសង្គមខ្មែរនិយម គណបក្សសង្គមថ្មី គណបក្សខ្មែរជាតិនិយម គណបក្សនាងនាគនារីខ្មែរ គណបក្សពន្លឺសេរីភាពលោកថាច់ រ៉េង គណបក្សស្ត្រីសង្គ្រោះកម្ពុជា និងគណបក្សសេរីបង្រួបបង្រួមជាតិ បានប្រព្រឹត្តល្មើសនឹងបទប្បញ្ញត្តិមាត្រា៣១ នៃច្បាប់ស្តីពីគណបក្សនយោបាយ។ បទល្មើសនើ គឺការមិនបានផ្ញើរបាយការណ៍ប្រចាំឆ្នាំ ជូនមកក្រសួងមហាផ្ទៃតាមឆ្នាំនីមួយៗ ជាបន្តបន្ទាប់ ហើយកំពុងជាប់បណ្តឹងនៅសាលាដំបូងរាជធានីភ្នំពេញ។
ទន្ទឹមនឹងនេះ សម្តេចក្រឡាហោម ស ខេង បានលើកឡើងថា សាលាដំបូងរាជធានីភ្នំពេញ ក៏បានចេញសាលក្រមផ្អាកសកម្មភាពបណ្តោះអាសន្ន ចំពោះគណបក្សនយោបាយចំនួន ៤ ក្នុងចំណោម ៩ គណបក្សខាងលើនេះ រួមមាន គណបក្សនាងនាគនារីខ្មែរ គណបកក្សពន្លឺសេរីភាពលោកថាច់ រ៉េង គណបក្សសេរីបង្រួបបង្រួមជាតិ និងគណបក្សស្ត្រីសង្គ្រោះកម្ពុជា។
សម្តេចក្រឡាហោម ស ខេង បានបញ្ជាក់ថា មកដល់ពេលនេះ គណបក្សនយោបាយខាងលើ មិនបានបំពេញកាតព្វកិច្ច ក្នុងការបំពេញបែបបទ ផ្ញើមកក្រសួងមហាផ្ទៃ ស្របតាមបទប្បញ្ញត្តិ ដូចមានចែងនៅក្នុងមាត្រា ២៦ថ្មី និងមាត្រា ៤៨ថ្មី នៃច្បាប់ស្តីពីគណបក្សនយោបាយ។
របាយការណ៍របស់ក្រសួងមហាផ្ទៃ បង្ហាញថា គិតមកដល់ដំណាច់ឆ្នាំ២០១៦ គណបក្សនយោបាយ នៅកម្ពុជា មានចំនួនសរុប ៦៩ គណបក្ស ក្នុងនោះ គណបក្សបានបង្កើត តែមិនទាន់បានចុះបញ្ជីនៅក្រសួងមហាផ្ទៃ មានចំនួន ២៥ គណបក្ស និងគណបក្សនយោបាយ ដែលបានចុះបញ្ជី ចំនួន ៤៤ គណបក្ស៕
សូមទស្សនាព័ត៌មានជាវីដេអូ៖
ប្រភព៖ PNN News