ថ្ងៃសៅរ៍ ទី២០ ខែមេសា ឆ្នាំ២០២៤
ថ្ងៃសៅរ៍ ទី២០ ខែមេសា ឆ្នាំ២០២៤
ក្នុងសន្និសីទកាសែត កាលពីព្រឹកថ្ងៃទី២៤ ខែសីហា ឆ្នាំ២០១៧ នៅទីស្តីការក្រសួងព័ត៌មាន ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបញ្ជាក់ហើយបញ្ជាក់ទៀតថា រាជរដ្ឋាភិបាល តាមរយៈក្រសួងព័ត៌មាន មិនបានបិទវិទ្យុអាស៊ីសេរី RFA និងវិទ្យុសំឡេងសហរដ្ឋអាមេរិក VOA នៅក្នុងប្រទេសកម្ពុជានោះទេ។ ប៉ុន្តែ ក្រសួងព័ត៌មាន បានសម្រេចបិទវិទ្យុក្នុងស្រុកមួយចំនួន ដែលបានរំលោភលើកិច្ចសន្យារវាងម្ចាស់ស្ថានីយវិទ្យុទាំងនោះ ជាមួយនឹងក្រសួងព័ត៌មាន ហើយវិទ្យុក្នុងស្រុក ដែលត្រូវក្រសួងព័ត៌មាន ដកអាជ្ញាប័ណ្ណនោះ បានជួលម៉ោងផ្សាយឲ្យវិទ្យុអាស៊ីសេរី និងវិទ្យុសំឡេងសហរដ្ឋអាមេរិក ។
ដោយបញ្ជាក់ហើយបញ្ជាក់ទៀតយ៉ាងច្បាស់នូវជំហររបស់រាជរដ្ឋាភិបាល ក៏ដូចជាក្រសួងព័ត៌មាន ឯកឧត្តមរដ្ឋមន្ត្រី ខៀវ កាញារីទ្ធ ក៏បានប្រកាសទាមទារឲ្យវិទ្យុ ដែលទទួលជំនួយពីអាមេរិកទាំង ២នេះ គឺវិទ្យុអាស៊ីសេរី RFA និងវិទ្យុសំឡេងសហរដ្ឋអាមេរិក VOA ផ្សាយកែតម្រូវឡើងវិញថា ក្រសួងព័ត៌មាន មិនបានបិទវិទ្យុទាំងពីរនេះទេ។ ក្នុងនោះ ឯកឧត្តមរដ្ឋមន្ត្រី បានប្រកាសចាំមើលជំហររបស់វិទ្យុទាំង ២នេះសិន មុននឹងពិចារណាលើការបើកការិយាល័យរបស់វិទ្យុទាំងពីរ នៅរាជធានីភ្នំពេញ។
ឯកឧត្តមរដ្ឋមន្ត្រីក្រសួងព័ត៌មាន ក៏បានព្រមានថា ម្ចាស់ស្ថានីយវិទ្យុក្នុងស្រុក ដែលរំលោភលើកិច្ចសន្យាជាមួយក្រសួងព័ត៌មាន ដោយបានជួលម៉ោងផ្សាយឲ្យវិទ្យុសំឡេងប្រជាធិបតេយ្យ VOD វិទ្យុអាស៊ីសេរី RFA និងវិទ្យុសំឡេងសហរដ្ឋអាមេរិក VOA ក៏ត្រូវប្រឈមមុខតាមផ្លូវច្បាប់ដោយក្រសួងព័ត៌មាននឹងប្តឹង ទៅតុលាការ ករណីរំលោភកិច្ចសន្យា និងរំលោភសេចក្តីទុកចិត្តនេះផងដែរ។
យ៉ាងណាក៏ដោយ ឯកឧត្តម ខៀវ កាញារីទ្ធ បានបញ្ជាក់ថា រហូតដល់ពេលនេះ នៅមានវិទ្យុមួយចំនួន នៅតែបន្តផ្សាយព័ត៌មានរបស់វិទ្យុអាស៊ីសេរី RFA និងវិទ្យុសំឡេងសហរដ្ឋអាមេរិក VOA ដដែល។
សូមបញ្ជាក់ថា កាលពីថ្ងៃទី២១ ខែសីហា ឆ្នាំ២០១៧ ឯកឧត្តម ខៀវកាញារីទ្ធ រដ្ឋមន្ត្រីក្រសួងព័ត៌មាន បានចេញលិខិតជូនដំណឹងទៅកាន់ម្ចាស់ស្ថានីយវិទ្យុមួយចំនួន ក្នុងនោះ រួមមានវិទ្យុមហានគរ FM 93.50 MHz នៅភ្នំពេញ និងស្ថានីយផ្សាយបន្តតាមបណ្តាខេត្តនានា ឈប់ឲ្យផ្សាយបន្តទៀត ដោយសារសំអាងថា វិទ្យុនេះ បានរំលោភកិច្ចសន្យាជាមួយក្រសួងព័ត៌មាន ព្រោះតែវិទ្យុនេះ យកម៉ោងផ្សាយរបស់ខ្លួន ជួលឲ្យគេ។
ពាក់ព័ន្ធនឹងកាសែត Cambodia Daily ក៏ត្រូវបានឯកឧត្តម ខៀវ កាញារីទ្ធ លើកឡើងថា មិនមែនជារឿង សេរីភាពសារព័ត៌មានទេ។ តែជាករណីផ្លូវច្បាប់ ដែលកាសែតនេះ មិនបានបង់ពន្ធ រហូតដល់ ៦លានដុល្លារ។ អគ្គនាយកដ្ឋានពន្ធដារ បានកំណត់ឲ្យកាសែត Cambodia Daily ត្រូវបង់ពន្ធនោះ ត្រឹមថ្ងៃទី៤ ខែកញ្ញា ឆ្នាំ២០១៧។
ពាក់ព័ន្ធនឹងការព្រួយបារម្ភរបស់ លោកស្រី Heather Nauert អ្នកនាំពាក្យក្រសួងការបរទេសសហរដ្ឋអាមេរិកចំពោះការធ្លាក់ចុះនៃបរិយាកាសប្រជាធិបតេយ្យនៅកម្ពុជា ក៏ដូចជាការអំពាវនាវ ឲ្យរដ្ឋាភិបាលកម្ពុជា អនុញ្ញាតឱ្យអង្គការ NDI កាសែត Cambodia Daily និងបណ្តាញសារព័ត៌មានឯករាជ្យដទៃទៀត ព្រមទាំងអង្គការសង្គមស៊ីវិល បានបន្តសកម្មភាពដ៏សំខាន់របស់ពួកគេ ដើម្បីឱ្យការបោះឆ្នោតជាតិ នៅកម្ពុជា ក្នុងឆ្នាំ២០១៨ ប្រព្រឹត្តទៅក្រោមបរិយាកាសសេរី និងបើកចំហរនោះ ឯកឧត្តម ខៀវ កាញារីទ្ធ បានឆ្លើយតបថា "អាមេរិកសំបូរលុយច្រើនដែរ ជួយចេញលុយពន្ធឲ្យកាសែត Cambodia Daily ទៅ គឺមិនពិបាកអ្វីសោះ។ នេះបើអាមេរិក ពិតជាចង់ជួយមែនទែននោះ”។
យ៉ាងណាក៏ដោយ ឯកឧត្តមរដ្ឋមន្ត្រី ខៀវ កាញារីទ្ធ បានគូសបញ្ជាក់ថា "ជំហររបស់កម្ពុជាជាមួយអាមេរិក គឺយើងនៅតែជាប្រទេសមួយ ដែលមានទំនាក់ទំនងការទូតជាមួយគ្នា"៕
ប្រភព៖ PNN News