ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
ថ្ងៃព្រហស្បតិ៍ ទី២៥ ខែមេសា ឆ្នាំ២០២៤
មន្ត្រីក្រសួងសុខាភិបាល បានព្រមានថា នឹងចាត់វិធានតឹងរ៉ឹង ឬអនុវត្តច្បាប់ ស្តីពីការត្រួតពិនិត្យផលិតថ្នាំជក់ ចំពោះក្រុមហ៊ុនផលិតបារី និងទាំងអ្នកជក់បារី ពោលគឺមិនមែនជាពេលអប់រំទៀតទេ ព្រោះបារី ជាឃាតកលេខ ១ ក្នុងលោក។ ហើយនៅកម្ពុជា បារី បានសម្លាប់មនុស្ស ១ ម៉ឺននាក់ ក្នុង ១ឆ្នាំ ឬ បារីសម្លាប់ពលរដ្ឋកម្ពុជា ២៨ ទៅ ៣០ នាក់ ក្នុង ១ ថ្ងៃ។ កម្ពុជា ចំណាយប្រមាណជា ១០០ លានដុល្លារ ទៅលើការទិញផលិតផលថ្នាំជក់ ក្នុង ១ ឆ្នាំៗ។ នេះមិនទាន់គិតដល់ផលប៉ះពាល់ផ្សេងៗ ដូចជាការចំណាយទៅលើការព្យាបាល មុនពេលស្លាប់ ជាដើម។
ឥឡូវនេះ ជាពេលត្រូវចាត់វិធានការតឹងរ៉ឹង ឬ ដល់ពេលដែលត្រូវអនុវត្តច្បាប់ហើយ ចំពោះឧស្សាហករណ៍ផលិតផលថ្នាំជក់ និងអ្នកជក់បារី បន្ទាប់ពីបានឆ្លងកាត់ដំណាក់កាលអប់រំរយៈពេលប៉ុន្មានឆ្នាំមកនេះ។ នេះគឺជាការលើកឡើងរបស់ឯកឧត្តម អ៊ឹង ភីរុន រដ្ឋលេខាធិការក្រសួងសុខាភិបាល ។
ឯកឧត្តម អ៊ឹង ភីរុន ថ្លែងដូច្នេះ នាឱកាសដែលឯកឧត្តម អញ្ជើញជាអធិបតីក្នុងសិក្ខាសាលា ស្តីពី ការប្រើប្រាស់ឧបកររណ៍សម្រាប់ប៉ាន់ប្រមាណ នៃការជក់បារី ដើម្បីកំណត់នូវកម្មវិធីត្រួតពិនិត្យផលិតផលថ្នាំជក់ ដែលរៀបចំនៅឯមជ្ឈមណ្ឌលជាតិលើកកម្ពស់សុខភាព កាលពីថ្ងៃទី ២៣ ខែ សីហា ឆ្នាំ ២០១៧ ។
សូមបញ្ជាក់ថា ច្បាប់ស្តីពីការត្រួតពិនិត្យផលិតផលថ្នាំជក់ ត្រូវបានចេញឱ្យប្រើប្រាស់ កាលពីថ្ងៃទី១៨ ខែឧសភា ឆ្នាំ ២០១៥។ តំណាងអង្គការសុខភាពពិភពលោក លោកវេជ្ជបណ្ឌិត យ៉ិល ដារាវុធ បានកត់សម្គាល់ថា តាំងពីច្បាប់នេះ ត្រូវបានដាក់ឱ្យអនុវត្តមក មានការប្រែប្រួលប្រកបដោយវិជ្ជមាននៅក្នុងសង្គមកម្ពុជា ចំពោះការប្រើប្រាស់ផលិតផលថ្នាំជក់ ហើយលោកគាំទ្រចំពោះក្រសួងសុខាភិបាល ដែលគ្រោងនឹងចាត់វិធានការតឹងរ៉ឹង ចំពោះក្រុមហ៊ុនផលិតផលថ្នាំជក់ និង អ្នកជក់បារី ៕
សូមទស្សនាព័ត៌មានជាវីដេអូ៖
ប្រភព៖ PNN News