ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
រហូតមកដល់ពេលនេះមនុស្សចំនួន ២ នាក់កំពុងបាត់ខ្លួននៅឡើយខណៈដែលមនុស្សចំនួន ៣ នាក់ទៀតបានរងរបួសនៅក្នុងគ្រោះអគ្គិភ័យរោងចក្រចម្រាញ់យកប្រេងនៅខេត្តហ្វូជានស្ថិតនៅភាគខាងកើតប្រទេសចិនកាលពីយប់មិញនេះ។
គិតត្រឹមថ្ងៃអាទិត្យ អណ្ដែតភ្លើងនិងផ្សែងខ្មួលខ្មាញ់នៅក្នុងរោងចក្រចម្រាញ់យកប្រេងបានធ្វើឲ្យមនុស្សចំនួន ២ នាក់កំពុងបាត់ខ្លួននៅឡើយ ហើយមនុស្សចំនួន ៣ នាក់ទៀតបានរងរបួសក្រោយពីអគ្គិភ័យយ៉ាងសន្ធោសន្ធៅមួយបានផ្ទុះឡើងនៅក្នុងទីក្រុងឡុងយ៉ាននៃខេត្តហ្វូជានស្ថិតនៅខាងកើតប្រទេសចិន។
អគ្គិភ័យនេះបានកើតឡើងនៅក្រុមហ៊ុនថាមពលថ្មី ឡុងយ៉ានហ្ស៊ូយូ ដែលស្ថិតនៅក្នុងទីក្រុងទៀសាននៃស្រុកស៊ីនលូ ហើយប្រជាពលរដ្ឋរស់នៅក្បែរនោះត្រូវបានជម្លៀសទៅកន្លែងមានសុវត្ថិភាពខណៈដែលក្រុមអ្នកពន្លត់អគ្គិភ័យរាប់រយនាក់កំពុងបន្តប្រយុទ្ធប្រឆាំងនឹងអគ្គិភ័យនេះ។
មន្ត្រីសង្គ្រោះបន្ទាន់បាននិយាយថា ជនរងគ្រោះទាំងនេះត្រូវបានបញ្ជូនទៅមន្ទីរពេទ្យភ្លាមៗដោយជនរងគ្រោះម្នាក់ក្នុងចំណោម ៣ នាក់នោះកំពុងស្ថិតក្នុងស្ថានភាពធ្ងន់ធ្ងរជាងគេ។
តាមរបាយការណ៍ស៊ើបអង្កេតបាននិយាយពីថ្ងៃអាទិត្យថា មូលហេតុនៃគ្រោះថ្នាក់នេះគឺដោយសារអាកាសធាតុក្ដៅដែលងាយឲ្យមានអគ្គិភ័យកើតឡើងខណៈដែលកម្មករកំពុងរៀបចំនិងលាងសម្អាតទុកដាក់កន្លែងស្តុកឧស្ម័ននៅក្នុងរោងចក្រចម្រាញ់យកប្រេងនេះ៕
ប្រែសម្រួល៖ ប៉ិច ស៊ីនួន
