ទោះបីជាកម្មវិធីដើរបង្ហាញម៉ូដនៅទីក្រុងប៉ារីសដែលធ្លាប់មានអ្នកច្នៃម៉ូដល្បីៗទូទាំងពិភពលោកមកចូលរួមត្រូវបានរំសាយចោលក្ដី ក៏ម៉ាកសំលៀកបំពាក់ Christian Dior បន្តការបង្ហាញម៉ូដសំលៀកបំពាក់ថ្មីៗរបស់ខ្លួន តាមរយៈប្រព័ន្ធអនឡាញ ដោយបានប្រើប្រាស់ម៉ានីកាំងតូចៗ ខុសប្លែកពីសព្វដង។

ម៉ូដសំលៀកបំពាក់ថ្មីដែល Christian Dior បានបង្ហាញនៅដើមសប្ដាហ៍នេះ គឺជាប្រភេទរ៉ូប ដែលមានសរុបចំនួន ៣៧ ឈុត ដោយរ៉ូបនីមួយៗគឺមានទាំងប្រភេទតូចសម្រាប់ម៉ានីកាំងតូច និងប្រភេទធំ។ មុនការបង្ហាញម៉ូដទាំងនេះដល់សាធារណជន Christian Dior បានបញ្ជូនពួកវាទៅដល់អតិថិជនលំដាប់កំពូលរបស់ខ្លួននៅជុំវិញពិភពលោក។

គួរបញ្ជាក់ថា ជារៀងរាល់ឆ្នាំ នៅអំឡុងខែកក្កដានេះ ក្នុងទីក្រុងប៉ារីស ប្រទេសបារាំងគឺមានប្រារព្ធនូវកម្មវិធីដើរបង្ហាញម៉ូដសម្លៀកបំពាក់ប្រណិត Haute Couture (អូត ខូឈួ) ដែលមានប្រមូលផ្ដុំដោយការបង្ហាញម៉ូដពីម៉ាកល្បីៗជាច្រើន។ ប៉ុន្តែកម្មវិធីនាឆ្នាំនេះត្រូវបានរំសាយចោលហើយដោយការរាតត្បាតនូវជំងឺកូវីដ១៩ពាសពេញពិភពលោក៕ 

ប្រែសម្រួល៖ វ៉ាន់ថន