ថ្ងៃសុក្រ ទី២៦ ខែមេសា ឆ្នាំ២០២៤
ថ្ងៃសុក្រ ទី២៦ ខែមេសា ឆ្នាំ២០២៤
អនុរដ្ឋលេខាធិការក្រសួងបរិស្ថាន ឯកឧត្តម ឃុត ចាន់ដារ៉ា បានលើកឡើងថា ជាច្រើនទសវត្សរ៍មកហើយ យើងតែងតែអាស្រ័យលើប្រភពធនធានធម្មជាតិ និងធ្វើអាជីវកម្មលើធនធានធម្មជាតិ ពី ១ ថ្ងៃ ទៅ ១ថ្ងៃ, ពី ១ឆ្នាំ ទៅ ១ ឆ្នាំ តើយើងគិតអំពីតុល្យភាព និងនិរន្តរភាព នៃប្រភពធនធានធម្មជាតិរបស់យើងដែរ ឬ ទេ? នេះហើយដែលយើងបាន និងកំពុងផ្លាស់ប្តូរធម្មជាតិ។
ឯកឧត្តម បន្តថា យើងត្រូវតែផ្លាស់ប្តូរខ្លួនយើងវិញ ដោយធ្វើអាជីវកម្មលើខួរក្បាលរបស់យើង បង្កើនភាពច្នៃប្រឌិត ភាពឈ្លាសវៃ បូករួមនឹងបច្ចេកវិទ្យាទំនើប ប្រែក្លាយតំបន់ធម្មជាតិ ឱ្យទៅជាតំបន់ទេសចរណ៍ធម្មជាតិ ដើម្បីបង្កើនការងារមុខរបរ និងប្រាក់ចំណូល ដល់ប្រជាពលរដ្ឋ។ អនុវត្តបែបនេះ បន្តិចម្តងៗ យើងនឹងមានបំណិនជីវិតលើវិស័យទេសចរណ៍ធម្មជាតិ ចូលរួមថែរក្សាធនធានធម្មជាតិ និងបង្កើនផលិតភាពនៃផលិតផលក្នុងស្រុក។
រូបភាព៖ ឯកឧត្តម ឃុត ចាន់ដារ៉ា។ (រូបភាពពី ហ្វេសប៊ុកក្រសួងបរិស្ថាន)
ឯកឧត្តម ឃុត ចាន់ដារ៉ា ថ្លែងយ៉ាងដូច្នេះ នាឱកាស ដែលឯកឧត្តមអញ្ជើញជាអធិបតី នៃវេទិកាយុវជនឆ្នើមថ្នាក់ជាតិ ពិភាក្សាអំពីបញ្ហាបរិស្ថានវគ្គដំបូង ដែលរៀបចំដោយក្រសួងបរិស្ថាន នៅឯមជ្ឈមណ្ឌលសហប្រតិបត្តិការកម្ពុជាជប៉ុន ហៅកាត់ថា CJCC កាលពីព្រឹកថ្ងៃទី១៧ ខែសីហា ឆ្នាំ២០១៧ ដែលមាននិស្សិតមកពីគ្រឹះស្ថានឧត្តមសិក្សាធំៗ ចំនួន ១៤ ចូលរួមជជែកដេញដោល។
ឯកឧត្តម ឃុត ចាន់ដារ៉ា បានបន្ថែមថា រាជរដ្ឋាភិបាល បាននិងកំពុងយកចិត្តទុកដាក់ខ្ពស់លើការដោះស្រាយបញ្ហាប្រឈមផ្នែកបរិស្ថាន ដើម្បីធានាគុណភាពបរិស្ថាន និងតុល្យភាព នៃប្រព័ន្ធអេកូឡូស៊ី សម្តៅលើកកម្ពស់សុខុមាលភាពសង្គម និងការអភិវឌ្ឍប្រកបដោយចីរភាព។ ក្នុងន័យនេះ រដ្ឋាភិបាល ដែលមានក្រសួងបរិស្ថាន ជាសេនាធិការ បានចាប់ផ្តើមធ្វើកំណែទម្រង់ស៊ីជម្រៅ ក្នុងវិស័យបរិស្ថាន ដូចជា កែសម្រួលប្រព័ន្ធគ្រប់គ្រង បង្ក្រាបបទល្មើសព្រៃឈើទ្រង់ទ្រាយធំ និងផ្ទេរសិទ្ធិគ្រប់គ្រងដីសម្បទានសេដ្ឋកិច្ច ជាដើម៕
ប្រភព៖ PNN News