ថ្ងៃសុក្រ ទី២៩ ខែមីនា ឆ្នាំ២០២៤
ថ្ងៃសុក្រ ទី២៩ ខែមីនា ឆ្នាំ២០២៤
ឆ្លងកាត់ការប្រកួតយ៉ាងស្វិតស្វាញអស់រយៈពេល ១១សប្ដាហ៍កន្លងមក កម្មវិធីប្រដាល់ក្បាច់បុរាណខ្មែរ សមរភូមិអ្នកប្រយុទ្ធភេសជ្ជៈគោជល់ របស់ស្ថានីយទូរទស្សន៍ ភីអិនអិន នឹងឈានមកដល់សប្តាហ៍ចុងក្រោយ នាថ្ងៃអាទិត្យ ទី១៨ ខែកញ្ញានេះ។ ក្នុងនោះទស្សនិកជននឹងប្លែកភ្នែក ចម្លែកអារម្មណ៍ ដោយនៅថ្ងៃនោះ នឹងមានរឿងរ៉ាវពិសេសៗ៣ ជុំវិញគុនខ្មែរ។
រឿងទី១ ដែលសំខាន់បំផុតនោះ គឺសង្វៀនរបស់ភីអិនអិន នឹងកក្រើកខុសពីសព្វមួយដង ដ្បិតអ្នកលេងគុនខ្មែរលំដាប់កំពូលពីររូប នឹងធ្វើព្យុះធ្វើភ្លៀង ពោលគឺ ពេជ្រ សីហា និង ឡុង សុវណ្ណឌឿន ត្រូវប្រជែងគ្នាដណ្ដើមខ្សែក្រវាត់ របស់កម្មវិធីសមរភូមិអ្នកប្រយុទ្ធភេសជ្ជៈគោជល់ ប្រភេទទម្ងន់៦៩ គ.ក អមដោយទឹកប្រាក់ជើងឯក ២០លានរៀល។
រឿងទី២ គឺអ្នកស្នងគុនខ្មែរពន្លកថ្មីកំពុងល្បី២រូប ក៏នឹងត្រូវតតាំងជាមួយអ្នកប្រដាល់មកពីថៃ គឺ ព្រឿង សុជាតិ ស្វាគមន៍ ភិតដាំ ដួងចៃផរ។ រីឯ ពេជ្រ ប៊ុនឆេន ត្រូវសាកកម្លាំងនឹង សាមស៊ីង លូកឈុនប្រាថាន។
ចុងក្រោយហើយអស្ចារ្យបំផុតនោះ គឺការប្រកួតវគ្គផ្ដាច់ព្រ័ត្រម៉ារ៉ាតុនទម្ងន់៦០គីឡូក្រាមប្រចាំខែ រវាង ខុន បូឡា និង ចាន់ សច្ចា ដូចគ្នានេះ រិទ្ធិ មុន្នី ត្រូវប៉ះគ្នាជាមួយ ផាន់ សារុន ដើម្បីដណ្ដើមបេក្ខភាពវ៉ៃជាមួយបរទេស ដែលភីអិនអិនបណ្តុះចេញពីការជម្រុះប្រចាំសប្តាហ៍នាពេលកន្លងមក។
ចំណីចក្ខុមិនធ្លាប់មានទាំងអស់នេះ មានតែនៅ ភីអិនអិន មួយគត់ ដែលនឹងផ្សាយផ្ទាល់ នាថ្ងៃអាទិត្យ ទី១៨ ខែកញ្ញា សប្តាហ៍នេះ ចាប់ពីវេលាម៉ោង៤រសៀលតទៅ៕